Read Buku Loyera - Chichewa Miy. 3 Bible Online

Miy. 3 - Buku Loyera - Chichewa bible

Miy. 3

¹Mwana wanga, usaiŵale malangizo angaŵa, koma mtima wako usunge malamulo anga.

²Ukatero zaka za moyo wako zidzachuluka, ndipo udzakhala ndi moyo wabwino kwambiri.

³Khalidwe la kudzipereka ndi kukhulupirika zisakuthaŵe, makhalidwe ameneŵa uziyenda nawo ngati mkanda wam'khosi, uŵalembe mumtima mwako.

⁴ Choncho udzapeza kuyanja ndi mbiri yabwino pamaso pa Mulungu ndi pa anthunso.

⁵Uzikhulupirira Chauta ndi mtima wako wonse, usadalire nzeru zako za kumvetsa zinthu.

⁶Pa ntchito zako zonse uzivomera kuti kuli Mulungu, choncho njira zako Iye adzazilungamitsa.

⁷ Usamadziwona ngati wanzeru. Uziwopa Chauta, ndipo uleke zoipa.

⁸Kuchita choncho kudzapatsa thupi lako moyo, kudzalimbitsa mafupa ako.

⁹Uzilemekeza nacho Chauta chuma chako chonse, uzimuyamika nazo zokolola zako zonse zam'minda.

¹⁰Ukatero, nkhokwe zako zidzadzaza ndi dzinthu dzambiri, mbiya zako zidzachita kusefukira ndi vinyo.

¹¹ Mwana wanga, usanyoze malango a Chauta, usatope nako kudzudzula kwake.

¹² Paja Chauta amadzudzula yemwe amamkonda, monga momwe atate amamchitira mwana wokondwera naye.

¹³Ngwodala munthu amene wapeza nzeru, amene walandira nzeru zomvetsa zinthu,

¹⁴pakuti phindu la nzeru nloposa phindu la siliva, nloposanso ndi phindu la golide lomwe.

¹⁵Nzeru ndi yoposa miyala yamtengowapatali. Palibe chinthu chochilakalaka cholingana ndi nzeruyo.

¹⁶Ndi nzeru imene imakupatsa moyo wautali. Ndi nzeru imene imakuninkha chuma ndi ulemu.

¹⁷Nzeru imakudzeretsa m'njira za chisangalalo, nimakuyendetsa mumtendere mokhamokha.

¹⁸Nzeru ili ngati mtengo woŵapatsa moyo oigwiritsa. Ngodala amene amaikangamira molimbika.

¹⁹Pamene adakhazikitsa dziko lapansi, Chauta adaonetsa nzeru. Pamene adakhazikitsa zakumwamba, adaonetsa nzeru za kumvetsa bwino.

²⁰Pamene adatumphutsa madzi kuchoka kunsi kwa dziko, ndipo mitambo idagwetsa mvula, adaonetsa nzeru zodziŵa zinthu.

²¹Mwana wanga, usunge nzeru yeniyeni usunge mkhalidwe wa kulingalira bwino, ziŵiri zimenezi zisakuthaŵe.

²²Zimenezi zidzakupatsa moyo, moyo wake wokongola ngati mkanda wam'khosi.

²³Tsono udzayenda pa njira yako mosaopa, phazi lako silidzaphunthwa konse.

²⁴Ukamakhala pansi, sudzachita mantha, ukamagona, udzakhala ndi tulo tabwino.

²⁵Usamaopa zoopsa zobwera modzidzimutsa, usamachita mantha ndi tsoka lodzagwera anthu oipa.

²⁶Chauta ndiye adzakhale chikhulupiriro chako, adzasunga phazi lako kuti lingakodwe.

²⁷ Usaleke kumchitira zabwino woyenera kuzilandira, pamene uli nazo mphamvu zochitira choncho.

²⁸Usamuuze mnzakoyo kuti, “Pita, ukachite kubweranso, ndidzakupatsa maŵa,” pamene uli nazo tsopano lino.

²⁹Usamkonzekere chiwembu mnzako, amene amakhala nawe pafupi mokudalira.

³⁰Usamakangane ndi munthu popanda chifukwa pamene iyeyo sadakuchite choipa chilichonse.

³¹Usachite naye nsanje munthu wachiwawa, usatsanzireko khalidwe lake lililonse.

³²Paja Chauta amanyansidwa ndi munthu woipa, koma olungama okha amayanjana nawo.

³³Chauta amatemberera nyumba ya anthu oipa, koma malo okhalamo anthu abwino amaŵadalitsa.

³⁴ Anthu onyoza, Iye amaŵanyoza, koma odzichepetsa Iye amaŵakomera mtima.

³⁵Anthu anzeru adzalandira ulemu, koma zitsiru adzazichititsa manyazi.