Read Buku Loyera - Chichewa Miy. 30 Bible Online

Miy. 30 - Buku Loyera - Chichewa bible

Miy. 30

¹Naŵa mau a Aguri, mwana wa Yake, wa ku Masa: Inu Mulungu, ine ndatopa. Inu Mulungu, ine ndatopa, ndalefukiratu.

²Ndithudi, ine ndine wopusa koposa anthu onse. Ndilibe nzeru zonga za munthu.

³Sindidaphunzire nzeru, ndipo Woyera uja sindimdziŵa.

⁴Kodi ndani adaakwera kumwamba natsikako? Ndani adafumbatapo mphepo m'manja? Ndani adafukusapo madzi m'chovala? Ndani adakhazikitsa mathero onse a dziko lapansi? Dzina lake ndani, ndipo mwana wake dzina lake ndani? Tanenatu ngati ukudziŵa!

⁵Mau aliwonse a Mulungu ndi oona. Iye ndiye chishango choteteza amene amathaŵira kwa Iye.

⁶Pa mau ake usamaonjezeko kanthu, kuwopa kuti angakudzudzule, ndipo ungapezeke kuti ndiwe wabodza.

⁷Inu Mulungu, ndikukupemphani zinthu ziŵiri, musandimane zimenezo ndisanafe:

⁸Musalole kuti ndikhale wabodza kapena wonama. Ndisakhale mmphaŵi kapena khumutcha. Muzindidyetsa chakudya chondiyenera,

⁹kuwopa kuti ndikakhuta kwambiri, ndingayambe kukukanani nkumanena kuti, “Chauta ndiye yaninso?” Kuwopanso kuti ndikakhala mmphaŵi, ndingayambe kuba, potero nkuipitsa dzina la Mulungu wanga.

¹⁰Wantchito usamsinjirire kwa mbuyake, kuti angakutemberere, ndipo iweyo ungapezeke kuti ndiwe wolakwa.

¹¹Pali ena amene amatemberera atate ao, ndipo sadalitsa amai ao.

¹²Pali ena amene amadziyesa oyera mtima, koma sadachotse zoipa zao.

¹³Pali ena amene amadzitukumula kwambiri, amadziyesa abwino kwabasi.

¹⁴Pali ena amene amasongola mano ao ngati malupanga, amaŵanola ngati mipeni, kuti adye amphaŵi ndi kuŵachotsa pa dziko lapansi, kutinso achotse anthu osauka pakati pa anzao.

¹⁵Mtsundu uli ndi ana aakazi aŵiri. Anawo amangokhalira kulira kuti, “Tipatseni chakuti, tipatseni chakuti.” Pali zinthu zitatu zimene sizikhuta. Pali zinthu zinai zimene siziti, “Takwana.”

¹⁶Manda, mkazi wosabala, nthaka yachiwumire ndiponso moto womangoyakirayakira.

¹⁷Aliyense amene amaseka bambo ndi kumanyozera kumvera mai, makwangwala akuchigwa adzamkoloola maso, ndipo mphungu zidzadya mnofu wake.

¹⁸Pali zinthu zitatu zimene zimandidabwitsa kwambiri. Pali zinthu zinai zimene sindizimvetsa konse, zinthuzo ndi izi:

¹⁹M'mene umaulukira mphamba mu mlengalenga, m'mene imayendera njoka pa thanthwe, m'mene chimayendera chombo pa nyanja yakuya, ndiponso m'mene mwamuna amachitira akakhala ndi namwali.

²⁰M'mene amachitira mkazi akachita chigololo amatere: amati akadya nkupukuta pakamwa, namanena kuti, “Palibe chimene ndalakwa.”

²¹Pali zinthu zitatu zimene dziko lapansi limanjenjemera nazo. Pali zinthu zinai zimene dziko lapansi silingathe kuzipirira:

²²kapolo akasanduka mfumu, chitsiru chikakhuta,

²³mkazi wonyozeka akakwatiwa, ndiponso mdzakazi akalanda malo a mbuyake.

²⁴Pali zinthu zinai zing'onozing'ono pa dziko lapansi, koma ndi zochenjera kwambiri:

²⁵Nyerere zili ngati anthu opanda nyonga, komabe zimakonzeratu chakudya chake m'chilimwe.

²⁶Mbira zili ngati anthu opanda nyonga, komabe zimakonza pokhala pake m'matanthwe.

²⁷Dzombe lilibe mfumu, komabe lonse limakhala m'magulumagulu poyenda.

²⁸Buluzi ungathe kumugwira ndi manja, komabe amakhala m'nyumba za mafumu.

²⁹Pali zinthu zitatu zimene zimayenda chinyachinya. Pali zinthu zinai zimene zimayenda monyadira:

³⁰Mkango umene uli ndi mphamvu kupambana nyama zonse, ndipo suthaŵa kanthu kalikonse.

³¹Tambala woyenda chinyachinya, ndi tonde, ndiponso mfumu yoyenda pakati pa anthu ake.

³²Ngati wakhala ukupusa ndi kumadzikweza, kapena wakhala ukukonzekera kuchita zoipa, yamba wati chete, uziganize bwino.

³³Paja ukakuntha mkaka, mafuta amapangika. Ukapsinya mphuno, magazi amatuluka, ndipo ukautsa mkwiyo, mikangano imaoneka.