Read Buku Loyera - Chichewa Miy. 31 Bible Online

Miy. 31 - Buku Loyera - Chichewa bible

Miy. 31

¹Naŵa mau a mfumu Lemuwele wa ku Masa amene adamphunzitsa mai wake:

²Nchiyani, mwana wanga? Nchiyani, mwana wa m'mimba mwanga? Nchiyani, mwana wanga amene ndidachita kukupempha polonjeza ndi malumbiro?

³Mphamvu zako usathere pa akazi, usamayenda nawo ameneŵa, amaononga ndi mafumu omwe.

⁴Iwe Lemuwele, mafumu sayenera kumamwa vinyo, olamulira asamalakalaka zakumwa zaukali,

⁵kuwopa kuti angaiŵale malamulo a dziko, ndi kukhotetsa zinthu zoyenerera anthu osauka.

⁶Munthu amene ali pafupi kufa, uzimpatsa chakumwa chaukali, ndipo munthu amene ali pa mavuto oopsa, uzimpatsa vinyo.

⁷Amwe kuti aiŵale umphaŵi wake asakumbukirenso kuvutika kwake.

⁸Munthu wosalankhula umlankhulire ndiwe. Anthu osiyidwa uŵalankhulire pa zoŵayenerera.

⁹Uzilankhula ndi kuweruza mwachilungamo. Uziteteza amphaŵi ndi osauka.

¹⁰Kodi mkazi wolemerera angathe kumpeza ndani? Ndi wokwera mtengo kuposa miyala ya yamtengowapatali.

¹¹Mtima wa mwamuna wake umamkhulupirira, ndipo mwamunayo sadzasoŵa phindu.

¹²Masiku onse a moyo wake, mkaziyo amachitira mwamuna wake zabwino osati zoipa.

¹³Amanka nafunafuna ubweya ndi thonje, ndipo amagwira ntchito ndi manja ake mwaufulu.

¹⁴Ali ngati zombo za anthu amalonda, zakudya zake amakazitenga kutali.

¹⁵Amadzuka usikusiku nkuyamba kukonzera chakudya anthu a pabanja pake, ndi kuŵagaŵira ntchito adzakazi ake.

¹⁶Amalingalira za munda, naugula. Amalima munda wamphesa ndi ndalama zozipeza ndi manja ake.

¹⁷Amavala dzilimbe ndipo sachita manja khoba pogwira ntchito.

¹⁸Amazindikira kuti malonda ake ndi aphindu, choncho nyale yake sizima usiku wonse.

¹⁹Thonje amadzilukira yekha, ndipo nsalu amadziwombera yekha.

²⁰Anthu osauka amaŵachitira chifundo, amphaŵi amaŵapatsa chithandizo.

²¹A pabanja pake saŵaopera kuti nkufa nacho chisanu, poti amadziŵa kuti onsewo amavala zovala zofunda.

²²Amadzipangira yekha zofunda, ndipo iye amavala zovala zabafuta ndi za mtengo wapatali.

²³Mwamuna wake ndi wodziŵika ndithu ku mabwalo, akakhala pakati pa akuluakulu a dziko.

²⁴Mkazi ameneyu amasoka zovala za nsalu yabafuta, nazigulitsa, amaperekanso mipango kwa anthu amalonda.

²⁵Mphamvu ndi ulemu zimakhala ngati chovala chake. Amaganiza zakutsogolo mosangalala.

²⁶Amalankhula mwanzeru, ndipo amaphunzitsa anthu ndi mau okoma.

²⁷Amayang'anira makhalidwe a anthu a pabanja pake, ndipo sachita ulesi mpang'ono pomwe.

²⁸Ana ake amamnyadira nkumutchula kuti ndi wodala. Mwamuna wake nayenso amamtamanda, amati,

²⁹“Inde alipo akazi ambiri olemerera kwabasi, koma kuyerekeza ndi iwe, onsewo nchabe.”

³⁰Nkhope yachikoka ndi yonyenga, kukongola nkosakhalitsa, koma mkazi woopa Chauta ndiye woyenera kumtamanda.

³¹Muzimlemekeza chifukwa cha zochita zake, ntchito zake zizimpatsa ulemu ku mabwalo.