Read Buku Loyera - Chichewa Miy. 4 Bible Online

Miy. 4 - Buku Loyera - Chichewa bible

Miy. 4

¹Ana inu, mverani malangizo a atate anu, tcherani khutu, kuti mupate nzeru zodziŵira zinthu.

²Ine ndikukupatsani malamulo abwino, musasiye zimene ndikukuphunzitsani.

³Pamene ndinali mwana m'nyumba mwa atate anga, m'menemo ndili kamwana kapamtima ka amai anga,

⁴atatewo adandiphunzitsa ndi mau akuti, “Ugwiritse mumtima mwako zimene ndikukuuzazi, usunge malamulo anga, kuti ukhale ndi moyo.

⁵Usaiŵale mau a pakamwa pangaŵa, usatayane nawo, Ukhale ndi nzeru, ndiponso khalidwe la kumvetsa zinthu.

⁶Usaisiye nzeru, ndipo idzakusunga. Uziikonda, ndipo idzakuteteza.

⁷Chachikulu pa nzeru ndi ichi: Kaya nchiyani chimene ungapate, peza nzeruyo, usalephere kupata khalidwe la kumvetsa zinthu.

⁸Uziilemekeza nzeruyo, ndipo idzakukweza. Uifungate ndipo idzakupatsa ulemerero.

⁹Idzaika pamutu pako nsangamutu yokongola yamaluŵa. Idzakuveka chisoti chaufumu chaulemu.”

¹⁰Mwana wanga, umvere ndi kuvomera zimene ndikunena. Ukatero, zaka za moyo wako zidzachuluka.

¹¹Ndakuphunzitsa njira yake ya nzeru. Ndakutsogolera pa njira za moyo wolungama.

¹²Ukamayenda, mapazi ako sazidzaombana. Ukamathamanga, sudzakhumudwa ai.

¹³Uŵasamale zedi, pakuti moyo wako wagona pamenepo.

¹⁴Usayende m'njira za anthu oipa, usatsate m'mapazi mwa anthu ochimwa.

¹⁵Njira zao uzipewe, usapitemo konse. Uzilambalale, ndi kungozipitirira.

¹⁶Iwo ajatu sangagone, mpaka atachita ndithu choipa. Tulo sangatiwone, mpaka atakhumudwitsapo munthu.

¹⁷Paja kuchita zoipa ndiye chakudya chao, kuchita ndeu ndiye chakumwa chao.

¹⁸Koma njira ya anthu okondweretsa Mulungu, ili ngati kuŵala kwa mbandakucha, kumene kumanka kukukulirakulira mpaka dzuŵa litafika pamutu.

¹⁹Njira ya anthu oipa ili ngati mdima wandiweyani. Satha kuzindikira kuti aphunthwa pa chiyani.

²⁰Mwana wanga, mvetsetsa mau anga. Tchera khutu ku zimene ndikunena.

²¹Zisachoke m'mutu mwakomu, uzisunge bwino mumtima mwako.

²²Paja zimampatsa moyo amene wazipeza, zimachiritsa thupi lake lonse.

²³Mtima wako uziwulonda bwino, pakuti m'menemo ndimo muli magwero a moyo.

²⁴Ulekeretu kulankhula zokhotakhota, usiyiretu kukamba zopotoka.

²⁵Maso ako aziyang'ana kutsogolo molunjika, uzipenya kutsogolo osacheukacheuka.

²⁶ Uzisamala m'mene mukupita mapazi ako, ndipo njira zako zonse zidzakhala zosapeneketsa.

²⁷Usapatukire kumanja kapena kumanzere, usayende pamene pali choipa chilichonse.