Read Buku Loyera - Chichewa Miy. 5 Bible Online

Miy. 5 - Buku Loyera - Chichewa bible

Miy. 5

¹Mwana wanga, umvetsere bwino zanzeru ndikukuuzazi, utchere khutu kwa ine womvetsa bwino zinthu,

²kuti uziganiza mochenjera, ndipo pakamwa pako pazilankhula zanzeru.

³Paja mkazi wadama ali ndi pakamwa pokoma ngati uchi, mau ake ndi osalala koposa mafuta.

⁴Koma kotsiriza kwake ngwoŵaŵa ngati chivumulo, ngwolasa ngati lupanga lakuthwa konsekonse.

⁵Mapazi ake ndi oloza ku imfa, poyenda amaloŵera njira yakumanda.

⁶Njira yamoyo saisamala mpang'ono pomwe. Njira zake nzokhotakhota, koma mwiniwakeyo sadziŵako.

⁷Tsopano, ana inu, mundimvere ine, musaŵataye mau a pakamwa panga.

⁸Uzilambalala kutali ndi mkazi wotere, usamafika kufupi ndi khomo la nyumba yake.

⁹Mwinamwina ulemu wako udzalanditsa kwa ena, zaka zako zaunyamata udzazitaya kwa anthu ankhanza.

¹⁰Mwinanso alendo adzadyerera chuma chako, phindu la ntchito zako lidzagwa m'manja mwa munthu wachilendo.

¹¹Ndipo potsiriza pa moyo wako udzalira chokuwa, thupi lako lonse litatheratu.

¹²Pamenepo iwe udzangoti, “Kalanga ine, ndinkadana nkusunga mwambo, mtima wanga unkanyoza chidzudzulo!

¹³Sindidamvere mau a aphunzitsi anga, sindidatchere khutu kwa alangizi anga.

¹⁴Pang'onong'ono, bwenzi nditaonongekeratu pakati pa mpingo wonse utasonkhana.”

¹⁵Iwe, uzimwera m'chitsime chakochako, ndiye kuti khala wokhulupirika kwa mkazi wako.

¹⁶Kodi ana ako azingoti mbwee ponseponse ngati madzi ongoyenda m'miseu?

¹⁷Anawo akhale a iwe wekha, osatinso uŵagaŵane ndi alendo.

¹⁸Uzikhutira ndi mkazi wako, uzikondwa ndi mkazi wa unyamata wako.

¹⁹Iye uja ngwokongola ngati mbaŵala, ndi wa maonekedwe osiririka ngati mbalale. Uzikhutitsidwa ndi maŵere ake nthaŵi zonse, uzikokeka ndi chikondi chake pa moyo wako wonse.

²⁰Mwana wanga, ungakopekerenji ndi mkazi wadama, ungamkumbatire bwanji mkazi wosakhala wako?

²¹Mayendedwe a munthu Chauta amaŵaona bwino lomwe, njira zake zonse amazipenyetsetsa.

²²Zoipa za munthu woipa zimamtchera msampha iyeyo, ntchito za machimo ake zimamkwidzinga.

²³Amafa chifukwa chosoŵa mwambo, amatayika chifukwa cha uchitsiru wake waukulu.