Read Buku Loyera - Chichewa Miy. 6 Bible Online

Miy. 6 - Buku Loyera - Chichewa bible

Miy. 6

¹ Mwana wanga, kodi udalonjeza kumlipirira mnzako chikole, kodi udaperekera mlendo chigwiriro?

²Kodi udakodwa ndi mau a pakamwa pako pomwe, kodi udagwidwa ndi mau olankhula iwe wemwe?

³Ndiye iwe mwana wanga, popeza kuti wadziponya m'manja mwa mnzako, chita izi kuti udzipulumutse: nyamuka, pita msanga, ukampemphe kuti akumasule.

⁴Usagone tulo, usaodzere,

⁵Dzipulumutse monga imadzipulumutsira mphoyo kwa mlenje, monga imadzipulumutsira kwa wosaka.

⁶Pita kwa nyerere, mlesi iwe. Kapenyetsetse makhalidwe ake, ukaphunzireko nzeru.

⁷Ilibe ndi mfumu yomwe, ilibe kapitao kapena wolamulira.

⁸Komabe imakonzeratu chakudya chake m'malimwe, ndipo imatuta chakudyacho m'masika.

⁹Kodi ukhalabe uli gone pamenepo mpaka liti, mlesi iwe? Kodi titha liti tulo takoto?

¹⁰ Ukati ndingogonako pang'ono, ndingoodzerako pang'ono chabe, ndingopinda manja okhaŵa kuti ndipumuleko,

¹¹umphaŵi udzakugwira ngati munthu wachifwamba, usiŵa udzakufikira mwadzidzidzi ngati mbala.

¹²Munthu wachabechabe, munthu woipa, amangoyendayenda nkumalankhula zabodza.

¹³ Amatsinzinira masoŵa nkumakwekwesa pansi mapazi ake, amalozaloza ndi chala chake.

¹⁴Amalingalira zoipa ndi mtima wake wopotoka, amangokhalira kuvundula madzi pakati pa anthu.

¹⁵Nchifukwa chake tsoka lidzamgwera modzidzimutsa. Pa kamphindi kochepa adzaonongedwa, osapulumuka konse.

¹⁶Zilipo zinthu zisanu ndi chimodzi zimene Chauta amadana nazo, makamaka zisanu ndi ziŵiri ndithu zimene zimamunyansa:

¹⁷maso onyada, pakamwa pabodza, manja opha munthu wosalakwa,

¹⁸mtima wokonzekera kuchita zoipa, mapazi othamangira msangamsanga ku zoipa,

¹⁹mboni yonama yolankhula mabodza, ndi munthu woutsa chidani pakati pa abale.

²⁰Mwana wanga, uzitsata malamulo a atate ako, usasiye zimene adakuphunzitsa amai ako.

²¹Zimenezi uzimatirire pamtima pako masiku onse, uzimangirire m'khosi mwako.

²²Pamene ukuyenda, zidzakulozera njira. Pamene ukukhala chogona, zidzakulonda. Pamene ukudzuka, zidzakulangiza.

²³Paja malamulowo ali ngati nyale, maphunzitsowo ali ngati kuŵala, madzudzulo a mwambo aja ndiwo mkhalidwe weniweni pa moyo wa munthu.

²⁴Zimenezi zidzakupulumutsa kwa mkazi woipa, zidzakuthandiza kuti usamvere mau osalala a mkazi wachiwerewere.

²⁵Mumtima mwako usamakhumbira kukongola kwake, usakopeke nawo maso ake.

²⁶Paja mkazi wachiwerewere ungathe kumgula ndi buledi, koma wadama wokwatiwa amakulanda ndi moyo wako womwe.

²⁷Kodi munthu angathe kufukata moto, zovala zake osapsa?

²⁸Kodi munthu angathe kuponda makala amoto, mapazi ake osapserera?

²⁹Ndizo zimamchitikira wokaloŵerera mkazi wamwini. Aliyense wokhudza mkazi wotero adzalangidwa.

³⁰Paja anthu sainyoza mbala, ikaba chifukwa cha njala.

³¹Komabe ikangogwidwa, imalipira kasanunkaŵiri, mpaka mwina kulandidwa katundu yense wa m'nyumba mwake.

³²Amene amachita chigololo ndi wopanda nzeru, amangodziwononga yekha.

³³Adzangolandira mabala ndi manyozo, ndipo manyazi ake sadzamchoka ai.

³⁴Paja nsanje imakalipitsa mwini mkaziyo, sachita chifundo akati alipsire.

³⁵Savomera dipo lililonse, sapepeseka ngakhale umpatse mphatso zochuluka chotani.