Read Buku Loyera - Chichewa Miy. 7 Bible Online

Miy. 7 - Buku Loyera - Chichewa bible

Miy. 7

¹Mwana wanga, mvera mau anga, malamulo anga akhale chuma chako.

²Utsate malamulo anga, ndipo udzakhala ndi moyo. Usamale malangizo anga monga umachitira ndi maso ako.

³Achite ngati waŵamangirira ku chala, ngati waŵadinda mumtima mwako.

⁴Nzeru uiwuze kuti, “Iwe ndiwe mlongo wanga,” ndipo khalidwe la kumvetsa zinthu ulitchule kuti, “Bwenzi langa lapamtima.”

⁵Zikuteteze kwa mkazi wadama, ku mau oshashalika a mkazi wosakhala wako.

⁶Tsiku lina pa windo la nyumba yanga, ndidasuzumira pa made,

⁷ndipo pakati pa anthu opusa, pakati pa achinyamata, ndidaona wachinyamata mmodzi wopanda nzeru.

⁸Ankayenda m'njira pafupi ndi nyumba ya mkaziyo, ankaphera mu mseu wa kunyumba kumeneko.

⁹Inali nthaŵi ya chisisira, madzulo, nthaŵi yausiku, kuli mdima.

¹⁰Ndiye mkazi adadzakumana naye, atavala ngati mkazi wadama, wa mtima wonyenga.

¹¹Mkaziyo ndi wosakhazikika ndi wopanda manyazi, kamwendom'njira wosakhala pakhomo.

¹²Mwina umpeza pa mseu, mwina pa msika, amachita kukhalizira munthu pa mphambano iliyonse.

¹³Tsono amamgwira mnyamata uja, nkumumpsompsona, amalankhula naye ndi nkhope yopanda manyazi kunena kuti,

¹⁴“Ndinayenera kupereka nsembe, ndipo lero ndachita zimene ndidazilumbirira.

¹⁵Motero tsopano ndabwera kuti ndidzakumane nawe, ndinkakufunafuna, tsono ndakupeza.

¹⁶Pabedi panga ndayalapo zofunda zabwino, pali nsalu zabafuta zamaŵangamaŵanga za ku Ejipito.

¹⁷Pomweponso ndawazapo zonunkhira za mure, ndi mankhwala a fungo lokoma a aloyi, ndi a sinamoni.

¹⁸Bwera tsono, tikhale malo amodzi mpaka m'maŵa, tisangalatsane ndi chikondi.

¹⁹Mwamuna wanga kulibe, ali pa ulendo wautali.

²⁰Adatenga thumba la ndalama, adzabwerako mwezi utakhwima.”

²¹Amamkopa mnyamatayo ndi mau onyengerera, amamkakamiza ndi mau ake oshashalika.

²²Pamenepo mnyamatayo amatsatira mkaziyo monga momwe ng'ombe imapitira kokaphedwa, kapena monga momwe mbaŵala imakodwera mu msampha,

²³mpaka muvi kuilasa m'mimba mwake. Amakhala ngati mbalame yothamangira m'khwekhwe, osadziŵako kuti aferapo.

²⁴Ndiye tsopano ana inu, mundimvere ine, mutchere khutu pa zimene ndinene ine.

²⁵Musatengeke mtima ndi njira za mkazi ameneyo, musasokere potsata njira zakezo.

²⁶Paja iye uja adagwetsa amuna ambiri, anthu amene adaŵaphetsa ngosaŵerengeka.

²⁷Nyumba yake ndi njira yakumanda, yotsikira ku dziko la anthu akufa.