Read Buku Loyera - Chichewa Miy. 8 Bible Online

Miy. 8 - Buku Loyera - Chichewa bible

Miy. 8

¹ Kodi suja nzeru imaitana? Suja nzeru zomvetsera zinthu zimakweza mau ake?

²Nzeru imakhala pa zitunda m'mbali mwa njira, imakaima pa mphambano za miseu.

³Imafuula pafupi ndi zipata kumaso kwa mzinda, ndiponso pamakomo poloŵera, imati,

⁴“Inu anthu, ndikukuitanani, kuitanaku ndikuitana anthu nonsenu.

⁵Inu osadziŵa kanthunu, phunzirani nzeru, inu opusanu, khalani tcheru.

⁶Mverani, ndikuuzani zazikulu kwambiri, pakamwa panga palankhula zolungama.

⁷Pakamwa panga palankhula zoona, kulankhula zoipa nchinthu chonyansa m'kamwa mwanga.

⁸Mau onse a pakamwa panga ngokondweretsa Mulungu, m'mau angawo mulibe zopotoka kapena zokhotakhota.

⁹Mau anga ngoona kwa munthu womvetsa, ngokhoza kwa anthu odziŵa zinthu.

¹⁰Landirani malangizo anga m'malo mwa siliva, funitsitsani kudziŵa zinthu, osati kuthamangira golide wabwino kwambiri.

¹¹ Nzerutu ndi yabwino kuposa miyala yamtengowapatali. Zonse zimene ungazilakelake sizingafanefane ndi nzeru.

¹²Ine nzeru ndimakhalira limodzi ndi kuchenjera. Ndimadziŵa zinthu ndipo ndimaganiza moyenera.

¹³Kuwopa Chauta nkudana ndi zoipa. Kunyada, kudzitama, kuchita zoipa ndi kulankhula zonyenga, zonsezo ndimadana nazo.

¹⁴Ndili ndi uphungu ndi maganizo abwino. Ndimamvetsa bwino zinthu, ndilinso ndi mphamvu.

¹⁵Ndimathandiza mafumu polamulira ndine, olamulira ndimaŵathandiza ndine kulamula zolungama.

¹⁶Ndine ndimathandiza akalonga polamula, ndine ndimathandiza akuluakulu poweruza m'dziko.

¹⁷Anthu ondikonda, ine nzeru ndimaŵakonda, anthu ondifunafuna mosamala, amandipeza.

¹⁸Ndili nacho chuma, ndili nawo ulemu, chuma chosatha ndiponso kukhuphuka konkirankira.

¹⁹Zimene mumalandira kwa ine nzokoma kuposa golide, ngakhale golide wosalala. Phindu lochokera mwa ine nloposa siliva wabwino zedi.

²⁰Ndimachita zomwe zili zoyenera, sindipatuka kuchoka m'njira za chilungamo.

²¹Ndimaŵapatsa chuma anthu ondikonda, ndi kudzaza nyumba zao zosungiramo chuma.

²² “Chauta adandilenga ine nzeru pa chiyambi cha ntchito zake. Mwa ntchito zake zakalekale woyambirira ndinali ine.

²³Ndidapangidwa masiku akalekale, pachiyambiyambi, dziko lapansi lisanalengedwe.

²⁴Nyanja zozama zisanalengedwe, padakalibe akasupe odzaza ndi madzi, nkuti ine nditabadwa kale.

²⁵Mapiri asanaumbidwe, magomo asanakhalepo, Mulungu anali atandilenga ineyo;

²⁶lisanalengedwe dziko lapansi ndi minda yake, lisanakhaleponso dothi loyamba la dziko lapansi.

²⁷ Ine ndinalipo kale, pamene ankakhazikitsa zakumwamba, pamene ankalemba mzere wa malire a nyanja yozama,

²⁸pamene ankaika thambo m'malo mwake, pamene ankatsekula akasupe a m'nyanja yozama,

²⁹pamene ankaika malire a nyanja kuti madzi ake asabzole malirewo, pamene ankaika maziko a dziko lapansi.

³⁰Nthaŵiyo nkuti ndili pambalipa ngati mmisiri wake, ndikumkondweretsa tsiku ndi tsiku, ndikusangalala pamaso pake nthaŵi zonse.

³¹Ndinkasangalala m'dziko lake lokhalamo anthu, ndi kumakondwa nawo ana a anthu.

³² “Ndipo tsopano, ana anga, tamverani, ngodala anthu amene amasunga malangizo anga.

³³Muzimva malangizo, kuti muzikhala anzeru, musamanyozere mau anga.

³⁴Ngwodala munthu amene amatchera khutu kwa ine, amene amakhala pakhomo panga tsiku ndi tsiku, amene amadikira pa chitseko changa.

³⁵Paja wondipeza ine, wapeza moyo, ndipo amapeza kuyanja pamaso pa Chauta.

³⁶Koma wosandipeza ine, akudzipweteka ameneyo. Onse odana ndi ine, ngokonda imfa amenewo.”