Read Buku Loyera - Chichewa Miy. 9 Bible Online

Miy. 9 - Buku Loyera - Chichewa bible

Miy. 9

¹Nzeru idamanga nyumba yake, idaimika nsanamira zake zisanu ndi ziŵiri.

²Idapha ziŵeto zake, idakonza vinyo wake, nkuyala tebulo lake.

³Idatuma adzakazi ake kuti akakhalire pa malo apamwamba mu mzinda ndipo akalengeze kuti,

⁴“Munthu wamba aliyense abwere kuno!” Kwa munthu wopanda nzeru imati,

⁵“Bwera, dzadyeko chakudya changa, ndipo udzamweko vinyo amene ndakonza.

⁶Leka kupulukira kwako, kuti ukhale ndi moyo, uziyenda m'njira ya nzeru.”

⁷Woyesa kukonza munthu wonyoza, amangonyozekerapo, wodzudzula munthu woipa, amangopwetekerapo.

⁸Wonyoza usamdzudzule, angadane nawe. Koma ukadzudzula munthu wanzeru, adzakukonda.

⁹Wanzeru ukamlangiza, adzakhala wanzeru koposa. Munthu wochita chilungamo ukamuphunzitsa, adzadziŵa zambiri koposa.

¹⁰ Kulemekeza Chauta ndiye chiyambi cha nzeru, kudziŵa Woyera uja nkukhala womvetsa bwino zinthu.

¹¹Chifukwa cha ine nzeru, masiku ako adzachuluka, ndipo ndidzaonjezera zaka pa moyo wako.

¹²Ngati ndiwe wanzeru, phindu ndi lako. Ngati umanyoza ena, udzavutika ndiwe wekha.

¹³Mkazi wopusa ngwaphokoso, ngwosachangamuka, ndiponso wosamvetsa zinthu.

¹⁴Amakhala pakhomo pa nyumba yake, pamalo pena pooneka bwino mu mzinda.

¹⁵Akatero nkumaitana amene akudutsapo, amene akungodziyendera, osafuna kupatuka.

¹⁶“Amati, inu anthu wamba, tapatukirani muno!” Tsono kwa wopanda nzeru amati,

¹⁷“Madzi akuba ndiwo amatsekemera, buledi wodya mobisa ndiye amakoma.”

¹⁸Koma mwamunayo sadziŵa kuti kumeneko kuli imfa, kuti alendo ake aloŵa kale m'manda ozama.