Read Buku Loyera - Chichewa Mla. 1 Bible Online

Mla. 1 - Buku Loyera - Chichewa bible

Mla. 1

¹Naŵa mau a Mlaliki, mwana wa Davide, mfumu ya ku Yerusalemu:

²Zonse nzopanda phindu, akutero Mlaliki. Zonse nzachabechabe! Ndithudi zonse nzopandapake.

³Kodi munthu amapindulanji ndi ntchito zonse zolemetsa zimene amazigwira pansi pano?

⁴ Mbadwo wina ukutha, wina ukudza, koma dziko lapansi limakhalapobe losasinthika.

⁵Dzuŵa limatuluka, nkukaloŵa, ndipo limapita mwamsanga kumene linatulukira.

⁶Mphepo imaombera chakumwera, nkudzakhotera chakumpoto. Imaomba mozungulirazungulira, pozungulirapo nkudzabwereranso komwe yachokera.

⁷Mitsinje yonse imakathira ku nyanja, koma nyanjayo osadzaza. Kumene madzi adachokera amabwereranso komweko.

⁸Zinthu zonse nzolemetsa, kulemera kwake nkosasimbika. Maso sakhuta nkupenya, makutunso sakhuta nkumva.

⁹Zomwe zidaalipo kale ndizo zidzakhaleponso. Zomwe zidaachitika kale ndizo zidzachitikenso. Ndiye kuti chatsopano palibiretu pansi pano.

¹⁰Kodi chilipo chinthu chimene wina anganene kuti, “Ichi ndiye nchatsopano?” Iyai, chidaalipo kale, ifenso kukadalibe nkomwe.

¹¹Zakale sizikumbukika, ngakhale zinthu zimene zidzachitike pambuyo pake sizidzakumbukikanso ndi amene adzabwere m'tsogolo mwake.

¹²Ine Mlalikine ndidakhalapo mfumu yolamulira Israele ku Yerusalemu.

¹³Ndidaaika mtima wanga pa kufunitsitsa kumvetsa bwino zonse zochitika pansi pano. Imeneyi ndi ntchito yolemetsa kwambiri imene Mulungu adatipatsa anthufe.

¹⁴Zonse zochitika pansi pano ndaziwona. Zonsezo nzopandapake, ndipo kuzifunafuna nkungodzivuta chabe.

¹⁵Chimene chidakhota sichingathe kuwongokanso, chimene palibe sichingathe kuŵerengedwa.

¹⁶ Mumtima mwangamu ndinkati, “Ndatola nzeru zambiri, kupambana onse amene ankalamulira ku Yerusalemu kale. Ndaphunzira zambiri zaluntha ndi zanzeru.”

¹⁷Ndidaayesetsa kumvetsa kuti nzeru nchiyani, misala nchiyani, uchitsiru nchiyani. Koma ndidazindikira kuti kuterokonso kunali kungodzivuta chabe.

¹⁸Paja nzeru zambiri zimadzetsa chisoni chambiri, munthu akamaonjezera nzeru, ndiye kuti akuwonjezeranso chisoni.