Read Buku Loyera - Chichewa Mla. 10 Bible Online

Mla. 10 - Buku Loyera - Chichewa bible

Mla. 10

¹Ntchentche zakufa zimaika fungo loipa m'mafuta onunkhira bwino. Choncho kupusa kwapang'ono kumatha kuwononga nzeru ndi ulemu.

²Mtima wa munthu wanzeru umamtsogolera bwino, koma mtima wa munthu wopusa umamsokeza.

³Chitsiru ngakhale chikamayenda mu mseu, zochita zake nzopanda nzeru ndithu, ndipo aliyense amachizindikira kuti nchitsirudi.

⁴Wolamula akakukwiyira, usachoke pa ntchito yako, pakuti kufatsa kumakonza ngakhale zolakwa zazikulu.

⁵Pansi pano pali choipa china chimene ndachiwona, choipa chake ndi cholakwa chimene amachichita wolamula.

⁶Opusa amaŵapatsa ntchito zapamwamba, olemera nkumaŵapatsa ntchito zotsika.

⁷Ndaona akapolo akuyenda pa akavalo, m'menemo akalonga akuyenda pansi ngati akapolo.

⁸ Amene amakumba dzenje adzagwamo yekha. Amene amaboola khoma njoka idzamuluma.

⁹Amene amakumba miyala, itha kumpweteka miyalayo. Amene amaŵaza nkhuni, atha kudzipweteka nazo.

¹⁰Nkhwangwa ikakhala yobuntha, nkupandanso kuinola, imalira mphamvu zambiri potema. Koma nzeru zimathandiza munthu kuti athedi kudula kanthu.

¹¹Nkopanda phindu kudziŵa kuseŵeretsa njoka ngati njokayo yakuluma kale.

¹²Mau a pakamwa pa munthu wanzeru amakondweretsa, koma pakamwa pa chitsiru mpoononga.

¹³Chitsiru chimayamba ndi mau opusa, potsiriza zolankhula zake zimangokhala zamisala basi.

¹⁴Chitsiru chimangochulutsa mau. Kodi ndani angadziŵe zimene zidzachitike kutsogolo? Ndani angathe kumuuza munthu zimene zidzachitike iye atafa?

¹⁵Chitsiru chimagwira ntchito modzitopetsa, koma njira yopita ku mzinda sichiidziŵa.

¹⁶Tsoka kwa iwe dziko, ngati mfumu yako ikali mwana, ndipo nduna zako zimachezera madyerero usiku wonse.

¹⁷Koma ndiwe wodala iwe dziko, ngati mfumu yako ndi mwana wa mfulu. Ndiwe wodala ngati nduna zako zimachita phwando pa nthaŵi yabwino, kuti zikhale zamphamvu, osati kuti ziledzere.

¹⁸Denga limaloshoka, mwini wake akakhala waulesi, ndipo nyumba imadontha, mwiniwake akakhala nthyamba.

¹⁹Phwando ndi lokondwetsa anthu, ndipo vinyo ndi wosangalatsa moyo. Komatu zonsezo nzolira ndalama.

²⁰Ngakhale mumtima mwako usamainyoza mfumu. Ngakhale m'chipinda mwako momwe usamatukwana wolemera. Mwina kambalame kamumlengalenga kapena kachilombo kena kouluka nkukumvera, kenaka nkukaulula zonse kwa amene umaŵanenawo.