Read Buku Loyera - Chichewa Mla. 9 Bible Online

Mla. 9 - Buku Loyera - Chichewa bible

Mla. 9

¹Zonse ndanenazi ndidazilingalirapo, ndipo ndidatsimikiza kuti anthu ochita chilungamo ndi anthu anzeru ali m'manja mwa Mulungu pamodzi ndi ntchito zao zomwe. Koma palibe munthu angadziŵe zimene zili m'tsogolo mwake, ngakhale zikhale za chikondi, kapena za chidani.

²Anthu onse zimene zidzaŵaonekere nzimodzimodzi, ochita chifuniro cha Mulungu ndi okana omwe, abwino ndi oipa, osamala zachipembedzo ndi osasamala omwe, opereka nsembe ndi osapereka omwe. Wabwino amafanafana ndi woipa. Wochita malumbiro amafanafana ndi woopa kulumbira.

³Chimene chili choipa kwambiri mwa zonse zochitika pansi pano ndi ichi chakuti tsoka limodzimodzi limagwera onse. Chinanso nchakuti mitima ya anthu njodzaza ndi zoipa. M'mitima mwao mumadzaza ndi zamisala pamene ali moyo, pambuyo pake kwao nkufa ndithu.

⁴Komabe amene ali ndi moyo ali nacho chikhulupiriro. Paja akuti ndiponi galu wamoyo kuposa mkango wakufa.

⁵Amoyo amadziŵa kuti adzafa, koma akufa sadziŵa kanthu, ndipo alibe mphotho inanso yoonjezera. Palibe ndi mmodzi yemwe woŵakumbukira.

⁶Chikondi chao, chidani chao ndi nsanje yao, zonse zidatha kale. Ndipo pa zonse zochitika pansi pano sadzalandirako kanthu konse mpakampaka.

⁷Ndiye iwe usaope, uzidya chakudya chako mokondwa, uzimwa vinyo wako ndi mtima wosangalala, pakuti Mulungu wavomereza kale zochita zakozo.

⁸Uzivala zovala zoyera nthaŵi zonse, uzidzola mafuta nthaŵi zonse.

⁹Uzikondwerera moyo pamodzi ndi mkazi amene umamkonda, pa masiku onse a moyo wako wopandapakewu umene Mulungu wakupatsa pansi pano. Ndi zokhazo zimene ungaziyembekeze pa moyo wako ndiponso pa ntchito zako zolemetsa zimene umazigwira pansi pano.

¹⁰Ntchito iliyonse imene ukuti uigwire, uigwire ndi mphamvu zako zonse. Pajatu kumanda kumene ukupitako kulibe ntchito, kulibe malingaliro, kulibe nzeru, ndiponso kulibe luntha.

¹¹Ndidaonanso pansi pano kuti opambana pa kuthamanga si aliŵiro okhaokha, opambana pa nkhondo si amphamvu okhaokha, ndiponso okhala ndi chakudya si anzeru okhaokha. Olemera si odziŵa zambiri okhaokha, ndipo si anthu aluso okhaokha amene anzao amaŵakomera mtima. Onsewo mwai umangoŵagwera pa nthaŵi yake.

¹²Kungoti munthu saidziŵa nthaŵi yake. Monga momwe nsomba zimagwidwira mu ukonde, monga momwenso mbalame zimakodwera mu msampha, anthunso nchimodzimodzi. Amachita ngati kukodwa mu msampha pa nthaŵi yoipa, pamene tsoka laŵagwera mwadzidzidzi.

¹³Pansi pano ndidaonanso chinthu china chokhudza nzeru, ndipo ine ndidachiwona kuti nchinthu chachikulu.

¹⁴Panali mzinda waung'ono, m'mene munali anthu oŵerengeka. Tsono padafika mfumu yamphamvu kudzauthira nkhondo mzindawo, nkuuzinga ndi zithando zankhondo.

¹⁵Koma mumzindamo munali munthu wina wosauka koma wanzeru. Munthu ameneyo adaupulumutsa mzindawo ndi nzeru zakezo. Komabe panalibe ndi mmodzi yemwe amene adamkumbukira wosaukayo.

¹⁶Ndiye ine ndikuti nzeru nzabwino ndithu kupambana mphamvu, ngakhale kuti anthu sazimvera nzeru za munthu wosauka, ndipo za mau ake salabadako nkomwe.

¹⁷Mau a munthu wanzeru, olankhula mofatsa, ndi abwino kupambana kufuula kwa mfumu pa gulu la zitsiru.

¹⁸Nzeru nzabwino kupambana zida zankhondo, koma wochimwa mmodzi amatha kuwononga zabwino zambiri.