Read Buku Loyera - Chichewa Nyi. 1 Bible Online

Nyi. 1 - Buku Loyera - Chichewa bible

Nyi. 1

¹ Nyimbo ya Solomoni, nyimbo yoposa nyimbo zonse. Mkazi

²Undimpsompsone ndi milomo yako, chifukwa chikondi chako nchoposa vinyo kukoma kwake.

³Mafuta ako odzola ngonunkhira bwino, dzina lako likundikumbutsa za mafuta otsanyukako. Nchifukwa chaketu, atsikana sangaleke kukukonda.

⁴Tenge, ndizikutsata, tiye tifulumire. Iwe mfumu yanga, kandiloŵetse m'chipinda mwako. Tizisangalala kwambiri ndi kukondwa limodzi. Chikondi chako tichitamande kupambana vinyo. Akazi onse amakukondera kaone!

⁵Inu akazi a ku Yerusalemu, ine ndine wakuda inde, komatu wokongola tsono. Ndine wakuda ngati mahema a ku Kedara, komabe wokongola ngati makatani a m'nyumba ya Solomoni.

⁶Musandiyang'ane monyoza chifukwa cha kudaku, ndi dzuŵatu lidandidetsali. Alongo anga adandikwiyira, mpaka kukandigwiritsa ntchito m'minda yamphesa. Koma munda wangawanga, osatha kuusamala.

⁷Tandiwuza, iwe wokondedwa wanga wapamtima, kumene umadyetsa ziŵeto zako, kumene umazigoneka masana. Nanga ndizingokhala ndili zunguliruzunguliru ku magulu a ziŵeto za abusa anzako! Mwamuna

⁸Iwe wokongola koposa akazi onsewe, ngati sukukudziŵa, uzingotsata m'makwalala a msambi wa ziŵeto, uzidyetsa mbuzi zako pambali pa mahema a abusawo.

⁹Iwe bwenzi langa, kukongola kwako, ngati akavalo a magaleta a Farao.

¹⁰Masaya ako akukongola ndi ndolo zam'makutuzi. Khosi lakonso likukongola ndi mikanda ya miyala yamtengowapatali.

¹¹Tidzakupangira ukufu wagolide, wokhala ndi timakaka tasiliva. Mkazi

¹²Pamene mfumu inali gone podyera pake, mafuta anga onunkhira adapereka kafungo kachikoka.

¹³Wokondedwa wanga ndikumuwona ngati kathumba ka mure, kamene kamakhala pakati pa maŵere angaŵa.

¹⁴Wokondedwa wanga ndikumuwona ngati chipukutu cha maluŵa ofiira a m'munda wamphesa wa ku Engedi. Mwamuna

¹⁵Iwe bwenzi langa, ndiwe wokongola, ndiwe chiphadzuŵa. Maso ako akunga ngati nkhunda. Mkazi

¹⁶Wokondedwa wanga, nawenso ndiwe wokongola, wokongoladi zedi. Malo athu ogonapo ndi msipu wobiriŵira.

¹⁷Mitanda ya nyumba yathu ndi yamkungudza, phaso lake ndi la mtengo wa paini.