Read Buku Loyera - Chichewa Nyi. 2 Bible Online

Nyi. 2 - Buku Loyera - Chichewa bible

Nyi. 2

¹Ndili ngati duŵa la ku Saroni, ngati kakombo wam'zigwa. Mwamuna

²Muja amakhalira kakombo pakati pa minga, ndi m'mene aliri wokondedwa wanga pakati pa atsikana. Mkazi

³Muja umakhalira mtengo wa apulosi pakati pa mitengo yam'nkhalango, ndi m'mene aliri wokondedwa wanga pakati pa anyamata. Ndinkakondwa kwambiri ndikausa mumthunzi mwake, zipatso zake zinali tseketseketseke m'kamwamu.

⁴Adanditenga kupita nane ku nyumba yaphwando, mbendera yake yozika pa ine inali chikondi.

⁵Mundidyetse mphesa zouma, munditsitsimutse ndi maapulosi, pakuti ndikumva chikondi chodwala nacho.

⁶Ha, ndidakakonda ineyo nditatsamira dzanja lake lamanzere, iyeyo nkundikumbatira ndi dzanja lamanja!

⁷Inu akazi a ku Yerusalemu, ndithu ndakupembani, pali mphoyo ndi nswala zakuthengo, chikondichi musachigwedeze kapena kuchiwutsa mpaka pamene chifunire ichocho. Mkazi

⁸Tamvani liwu la wokondedwa wanga! Taonani akubwera, akulumphalumpha pa mapiri, akujoŵajoŵa pa zitunda.

⁹Wokondedwa wanga ali ngati mphoyo, kapena mwanawambaŵala. Si uyo waimirira apoyo, kuseri kwa khoma lathulo, akusuzumira m'mawindo, akuyang'anira pa made a mawindo.

¹⁰Wokondedwa wanga akulankhula nkumandiwuza kuti: Mwamuna “Dzuka bwenzi langa, wokongola wanga, tiye tizipita.

¹¹Ona, nyengo yachisanu yatha, mvula yatha ndipo yapitiratu.

¹²Maluŵa ayamba kuwoneka m'dziko, nthaŵi yoimba yafika, njiŵa zikumveka kulira m'dziko mwathu.

¹³Mikuyu ikubereka zipatso, mipesa ikuyamba maluŵa. Mitengoyo ikutulutsa fungo lokoma. Dzuka bwenzi langa, wokongola wanga, tiye tizipita.

¹⁴Iwe nkhunda yanga, yokhala m'ming'alu yam'matanthwe, yobisala m'phiri lotsetsereka, ntaonako nkhope yako, ntamvako liwu lako. Paja liwu lako nlomveka bwino, ndipo nkhope yako ndi yokongola.

¹⁵Mutigwirire nkhandwe, nkhandwe zing'onozing'ono, zimene zimatiwonongera minda yamphesa, pakuti mipesa yathu idachita maluŵa.” Mkazi

¹⁶Wokondedwa wangayo ndi wangadi, ndipo ine ndine wake. Amadyetsa gulu lake la ziŵeto pakati pa akakombo.

¹⁷Kamphepo kamadzulo kakamayamba kuuzira, mithunzi ikamayamba kuthaŵa, unyamuke, iwe wokondedwa wanga, uthamange ngati mphoyo, kapena ngati mwanawambaŵala pakati pa mapiri azigwembezigwembe.