Read Buku Loyera - Chichewa Nyi. 3 Bible Online

Nyi. 3 - Buku Loyera - Chichewa bible

Nyi. 3

¹Usiku uliwonse ndili gone pabedi panga ndinkangomufunafuna amene mtima wanga umamkonda. Ndidamufunafuna koma osampeza. Ndidamuitana, koma iye osandiyankha.

²Ndiye ndidati, “Ai, tsopano ndidzuka ndi kuloŵa mu mzinda, m'miseu ndi m'mabwalo. Ndimufunafuna amene mtima wanga umamkonda.” Ndidamufunafunadi, koma osampeza.

³Alonda adandipeza pamene ankayendera mzinda. Ndidaŵafunsa kuti, “Kodi mwandiwonerako amene mtima wanga umamkonda?”

⁴Ndidangoti iwo aja ntaŵapitirira pang'ono, ndampeza amene mtima wanga umamkonda. Ndidamgwira, osamlola kuti achoke, mpaka nditamloŵetsa m'nyumba ya amai anga, m'chipinda cha amene adandibala.

⁵Inu akazi a ku Yerusalemu, ndithu ndakupembani, pali mphoyo ndi nswala zakuthengo, chikondichi musachigwedeze kapena kuchiwutsa mpaka pamene chifunire ichocho. Mkazi

⁶Kodi nchiyaninso icho chikutulukira ku chipululucho ngati utsi watolotolo, chonunkhira mure ndi lubani, chokhala ndi zonunkhira zonse zogulitsa anthu amalonda?

⁷Amenewo ndi machira a Solomoni. Pali ankhondo makumi asanu ndi limodzi, amuna anyonga a ku Israele operekeza.

⁸Onsewo agwira malupanga, ndipo ngodziŵa kumenya nkhondo, aliyense wavala lupanga pambali pake, kuti alimbane ndi aupandu usiku.

⁹Mfumu Solomoni adadzipangira machira a matabwa a ku Lebanoni.

¹⁰Milongoti yake adapanga yasiliva, kumbuyo kwake kunali kwagolide, pampando pake panali nsalu yofiirira.

¹¹Tulukani, inu akazi a ku Ziyoni, mudzaone Mfumu Solomoni, atavala chisoti chaufumu chimene mai wake adamuveka pa tsiku la ukwati wake, tsiku limene mtima wake unkasangalala.