Read Buku Loyera - Chichewa Nyi. 4 Bible Online

Nyi. 4 - Buku Loyera - Chichewa bible

Nyi. 4

¹Mwamuna Ndiwe wokongola, iwe wokondedwa wanga! Ndithuditu, ndiwe wokongoladi! Kumbuyo kwa nsalu yako yakumutuyo maso ako akuwoneka oŵala ngati nkhunda. Tsitsi lako likuchita pekupeku ngati mbuzi zoti zikutsetsereka pa mapiri a ku Giliyadi.

²Mano ako ali mbee ngati nkhosa zometa zoti angozisambitsa kumene. Mano onsewo ngoyang'anana bwino, palibe chigwelu nchimodzi chomwe.

³Milomo yako ili ngati mbota yofiira, ndipo pakamwa pako mpokongola zedi. Kukhalira kumbuyo kwa nsalu yako yakumutuyo, masaya ako, akuwoneka ngati mabandu a makangaza.

⁴Khosi lako lili ngati nsanja ya Davide, yomangidwa bwino ndipo yosalala. Mkanda wako wam'khosi, ngati zishango 1,000 zokoloŵeka kuzungulira nsanjayo.

⁵Maŵere ako ali ngati mbaŵala ziŵiri, ngati mphoyo zamapasa zimene zikudya pakati pa akakombo.

⁶Pamene kamphepo kamadzulo kakuyamba kuuzira, ndipo mithunzi ikuthaŵa, ndidzapita mofulumira ku phiri la mure, ndi ku chitunda cha lubani.

⁷Ndiwe wokongola kwabasi, iwe wokondedwa wanga. Ulibe nkachilema komwe.

⁸Tiye tichokeko ku Lebanoni, iwe mkazi wanga. Tiye tichoke ku Lebanoni kuno, utsagane ndi ine. Utsikepo pa nsonga ya phiri la Amana, pa nsonga ya phiri la Seniri ndi la Heremoni. Uchokemo m'mapanga a mikango, uchokeko ku ngaka za akambuku.

⁹Iwe mlongo wanga, iwe mkazi wanga, wangoti mtima wangawu kwe! Wanditenga mtima ndi kapenyedwe ka maso ako, ndiponso ndi mphande imodzi ya mkanda wa m'khosi mwako.

¹⁰Iwe mlongo wanga, iwe mkazi wanga, chikondi chako nchosangalatsa. Chikondi chako nchosangalatsa kupambana vinyo, mafuta ako ndi onunkhira bwino kupambana zonunkhira zabwino zonse.

¹¹Iwe mkazi wanga, milomo yako ili uchi mvee! Kunsi kwa lilime lako kuli ngati uchi ndi mkaka. Fungo la zovala zako likumveka ngati fungo la ku Lebanoni.

¹²Iwe mlongo wanga, iwe mkazi wanga, uli ngati munda wopiringidza, ngati munda wopiringidza, ngati kasupe wochingidwa.

¹³Kumeneko mbeu zimakondwa bwino. Munda wake, ngati dimba la makangaza lokhalanso ndi zipatso zokoma zamitundumitundu, ndi maluŵa amitundumitundu.

¹⁴Kuli mitengo ndi zitsamba zosiyanasiyana zopangira zonunkhira zabwino kwambiri.

¹⁵Iwe uli ngati kasupe wothirira munda, ngati chitsime cha madzi abwino, ngati mitsinje yamadzi yochokera ku Lebanoni. Mkazi

¹⁶Dzuka, iwe mphepo yakumpoto, bwera kuno, iwe mphepo yakumwera. Uuzire pa munda wanga kuti fungo lake lokoma likwanire ponseponse. Wokondedwa wanga aloŵe m'munda mwake, adye zipatso zake zokoma.