Read Buku Loyera - Chichewa Nyi. 5 Bible Online

Nyi. 5 - Buku Loyera - Chichewa bible

Nyi. 5

¹Mwamuna Ndaloŵa m'munda mwanga, iwe mlongo wanga, iwe mkazi wanga. Ndikukolola mure wanga ndi zokometsera chakudya. Ndikudya uchi wanga pamodzi ndi zisa zake zomwe. Ndikumwa vinyo wanga ndi mkaka wanga. Akazi Inu apaubwenzi, idyani ndi kumwa: Inu okondana, imwani kwambiri! Mkazi

²Kugona ndinagona, koma mtima wanga unali maso. Tamverani! Wokondedwa wanga akugogoda. Mwamuna “Tanditsekulira iwe mlongo wanga, iwe wokondedwa wanga, iwe nkhunda yanga, iwe wangwiro wanga. Mutu wanga wanyowa ndi mame, tsitsi langa lachita madzi chifukwa cha nkhungu yausiku.” Mkazi

³Zovala ndavula kale, ndingazivalenso bwanji? Ndasamba kale m'miyendo, nanga ndiidetsenso poyenda?

⁴Pamene wokondedwa wanga adangoti pisu dzanja pa chiboo chapachitseko, mtima wanga udachita kuti phwii!

⁵Ndidanyamuka kukamtsekulira wokondedwa wanga, manja anga ali noninoni ndi mure. Zalazi zili mure chuchuchu pa zogwirira za mpiringidzo.

⁶Ndidamtsekulira wokondedwa wanga, koma nkuti iyeyo atachokapo, atapita. Pamene iye ankalankhula, mtima wanga udangoti fumu! Ndidamfunafuna koma osampeza. Ndidamuitana, koma iye osandiyankha.

⁷Alonda adandipeza pamene ankayendera mzinda. Adandimenya mpaka kundipweteka. Alonda apamalingawo adandilanda mwinjiro wanga.

⁸Inu akazi a ku Yerusalemu, ndithu ndakupembani, mukampeza wokondedwa wangayo mumuuze kuti ine ndikumva chikondi chodwala nacho. Akazi

⁹Iwe wokongola koposa akazi onsewe, kodi wokondedwa wakoyo ngwopambana wina aliyense bwanji? Kodi wokondedwa wakoyo ngwopambana ena onse chotani kuti uzichita kupemba motere? Mkazi

¹⁰Wokondedwa wangayo ngwokongola, ndiponso wathanzi, wodziŵika zedi pakati pa amuna zikwi khumi.

¹¹Mutu wake uli ngati golide wosalala kwambiri. Tsitsi lake nlopotana bwino, lakuda bwino ngati nthenga za khwangwala.

¹²Maso ake amaoneka okongola ngati nkhunda zitakhala pa akasupe a madzi, ngati nkhunda zitasamba mu mkaka, zitangoima bwinobwino.

¹³Masaya ake ali ngati timinda ta mbeu zokometsera chakudya, zopatsa fungo lokoma. Milomo yake ili ngati akakombo, ili noninoni ndi zodzoladzola za mure.

¹⁴Mikono yake ili ngati nthambi zagolide za makaka a miyala yamtengowapatali. Thupi lake nlosalala ngati mnyanga wanjovu woti aikamo miyala ya safiro.

¹⁵Miyendo yake ili ngati mizati yamwala yokhazikika pa maziko agolide. Ali ndi maonekedwe aulemerero ngati mapiri a ku Lebanoni, maonekedwe aulemu ngati mitengo ya paini ya pamapiripo.

¹⁶Milomo yake njosangalatsa kwambiri, munthuyo amanditenga mtima kwabasi. Ameneyutu ndiye wokondedwa wanga, ndiponso bwenzi langa, inu akazi a ku Yerusalemu.