Read Buku Loyera - Chichewa Nyi. 6 Bible Online

Nyi. 6 - Buku Loyera - Chichewa bible

Nyi. 6

¹Akazi Iwe wokongola koposa akazi onsewe, kodi wokondedwa wakoyo wapita kuti? Kodi wokondedwa wakoyo waloŵera potani, kuti tichite kukuthandiza kumfunafuna? Mkazi

²Wokondedwa wanga watsikira kumunda kwakeku, ku timinda ta mbeu zokometsera chakudya. Akukadyetsa ziŵeto zake ku minda ndiponso akukathyola akakombo.

³Wokondedwa wangayo ine ndine wake, ndipo iyeyo ndi wangawanga. Amadyetsa ziŵeto zake pakati pa akakombo. Mwamuna

⁴Iwe bwenzi langa, ndiwe wokongola ngati Tiriza, wa maonekedwe abwino ngati Yerusalemu, ndiwe wochititsa mantha ngati gulu la ankhondo mbendera zili m'manja.

⁵Usandipenyetsetse, pakuti maso ako amanditenga mtima. Tsitsi lako likuchita pekupeku ngati mbuzi, zoti zikutsetsereka pa mapiri a ku Giliyadi.

⁶Mano ako ali mbee ngati nkhosa zometa, zoti angozisambitsa kumene. Mano onsewo ngoyang'anana bwino, palibe chigwelu nchimodzi chomwe.

⁷Kukhalira kumbuyo kwa nsalu yako yakumutuyo, masaya ako akuwoneka ngati mabandu a makangaza.

⁸Mfumu ili ndi akazi enieni makumi asanu ndi limodzi, ili ndi akazi aang'ono makumi asanu ndi atatu, ilinso ndi anamwali tayetaye!

⁹Koma ine nkhunda yanga, wangwiro wanga, ndi mmodzi yekha basi, mwana mmodzi yekha wa amai ake, mwana wapamtima wa amai ake. Anamwali atamuwona, adamutcha wodala. Akazi enieni a mfumu ndi akazi onse aang'ono adamtamanda.

¹⁰Ndani uyu wooneka ngati mbandakuchayu, wokongola ngati mwezi, woŵala ngati dzuŵa, wochititsa mantha ngati gulu la ankhondo mbendera zili m'manja?

¹¹Ndidatsikira ku munda wa mitengo ya alimondi, kuti ndikayang'ane maluŵa akuchigwa, kuti ndikaone ngati mipesa idaphukira, ngati makangaza adachita maluŵa.

¹²Ndisanazindikireko kanthu, ndidakhala ngati ndikulota kuti ndili m'galeta pambali pa mfumu yanga. Akazi

¹³Bwerera, bwerera, iwe namwali wa ku Sulami, bwerera kuti tidzakupenyetsetse. Mkazi Chifukwa chiyani mukuti mudzandipenyetsetse ine Msulamine, pamene ndikuvina pakati pa magulu aŵiri?[1]