Read Buku Loyera - Chichewa Nyi. 7 Bible Online

Nyi. 7 - Buku Loyera - Chichewa bible

Nyi. 7

¹Mwamuna Iwe namwali wachifumu, mapazi ako ngokongola m'nsapato wavalazo. Ntchafu zako nzoulungika bwino ngati miyala yamtengowapatali, yosemedwa ndi mmisiri waluso.

²Mchombo wako uli ngati chikho choulungika, chimene nthaŵi zonse nchodzaza ndi vinyo wabwino. Pamimba pako mponing'a ngati mtolo wa tirigu wozingidwa ndi akakombo.

³Maŵere ako akuwoneka ngati mbaŵala ziŵiri, ngati mphoyo zamapasa.

⁴Khosi lako lili see ngati nsanja ya mnyanga wanjovu. Maso ako ali ngati maiŵe a ku Hesiboni, amene ali pafupi ndi chipata cha ku Batirabimu. Mphuno yako ikuwoneka ngati nsanja ya ku Lebanoni, yoyang'ana ku Damasiko.

⁵Mutu wako uli bwinobwino neng'a, ngati phiri la Karimele, ndipo tsitsi lako lalitali lili chezichezi. Kukongola kwake kumatha kudolola ndi mfumu yomwe.

⁶Ndiwe wokongola zedi, ndiponso wosangalatsa, iwe wokondedwawe, namwali wokondweretsawe.

⁷Msinkhu wako uli ngati mtengo wa mgwalangwa, maŵere ako ali ngati masango a zipatso zake.

⁸Ndidati, ndikwera mu mtengo wa mgwalangwawu, ndikathyole zipatso zake. Maŵere ako akhale ngati masango a mphesa, fungo la mpweya wako likhale lonunkhira bwino ngati la maapulosi.

⁹Ukamandimpsompsona, ine kukhosi see, ngati ndikumwa vinyo wokoma kwambiri. Mkazi Tsono vinyo ameneyu amthirire wokondedwa wanga, ayenderere pa milomo yake ndi m'mano mwake.

¹⁰Wokondedwayo ine ndine wake, chilakolako chake chonse chili pa ine.

¹¹Bwera, wokondedwa wanga, tiye tiloŵe m'minda, tikagone ku midzi.

¹²Tiye tilaŵirire m'mamaŵa kupita ku minda yamphesa, tikaone ngati mipesa idaphuka, ngati nkhunje zake zidachita maluŵa, ndiponso ngati makangaza adachita maluŵa. Kumeneko ndidzakuwonetsa chikondi changa.

¹³Mitengo ya mankhwala a chisulo imapereka fungo labwino, pakhomo pathu pali zipatso zokoma zonse, zimene ndakusungira, iwe wokondedwa wanga.