Read Buku Loyera - Chichewa Nyi. 8 Bible Online

Nyi. 8 - Buku Loyera - Chichewa bible

Nyi. 8

¹Ha! Achikhala unali mlongo wanga, woyamwa bere limodzi ndi ine! Ndikadakumana nawe panjira, bwenzi ntakumpsompsona, ndipo wina aliyense sakadandinyoza.

²Ndikadakutenga nkukuloŵetsa m'nyumba ya amai anga, m'chipinda cha amene adandibala. Ndikadakupatsa vinyo wotsekemera kuti umwe, ndi madzi a makangaza.

³Ine ndikadatsamira dzanja lako lamanzere, iwe nkundikumbatira ndi dzanja lamanja.

⁴Inu akazi a ku Yerusalemu, ndithu ndakupembani, chikondichi musachigwedeze kapena kuchiwutsa mpaka pamene chifunire ichocho. Akazi

⁵Kodi ndani uyo akutuluka ku chipululuyo, atatsamira wokondedwa wake? Mkazi Ndidakudzutsa patsinde pa mtengo wa apulosi uja. Pamenepo mpamene amai ako adachirira pokubala iweyo.

⁶Umatirire mtima wako kuti musaloŵe winanso koma ine ndekha, ndipo sudzakumbatira winanso koma ine ndekha. Paja chikondi nchamphamvu ngati imfa, nsanje njaliwuma ngati manda. Chikondi chimachita kuti laŵilaŵi ngati malaŵi a moto, ndipo nchotentha koopsa.

⁷Ngakhale madzi ochuluka sangachizimitse chikondi, ngakhale madzi a chigumula sangachikokolole. Ngakhale munthu atapereka chuma chonse cha m'nyumba chifukwa chofuna kugula chikondi, adzangonyozeka nazo kotheratu. Alongo a Mkazi

⁸Tili naye ife mlongo wathu wamng'ono, alibe ndi maŵere omwe. Tidzamchitira chiyani mlongo wathu pa tsiku limene adzamfunsire mbeta?

⁹Iye akakhala ngati khoma, tidzammangira nsanja yasiliva. Koma akakhala ngati chitseko, tidzamchinga ndi matabwa amkungudza. Mkazi

¹⁰Ine ndili ngati khoma, ndipo maŵere anga ali ngati nsanja zake. Tsono m'maso mwa wokondedwa wanga ndili ngati wodzetsa mtendere. Mwamuna

¹¹Solomoni anali ndi munda wamphesa ku Baala-Hamoni. Mundawo adaubwereka alimi. Aliyense mwa iwo ankayenera kupereka ndalama zasiliva chikwi chimodzi kuti azilimamo.

¹²Koma munda wanga wamphesa ndi wangawanga, ndiponso wa ine ndekha. Iwe Solomoni, khala nazo ndalama chikwi chimodzi zija, khala nawonso alimi ako mazana aŵiri aja.

¹³Iwe amene umakhala m'munda anzanga akumvetsera kuti amve liwu lako. Tandilola kuti ndilimve. Mkazi

¹⁴Fulumiratu wokondedwa wanga, khala ngati mphoyo kapena ngati mwanawambaŵala wothamanga m'mapiri, m'mene mumamera mbeu zokometsera chakudya.