Read Buku Loyera - Chichewa Lun. 1 Bible Online

Lun. 1 - Buku Loyera - Chichewa bible

Lun. 1

¹Muzikonda chilungamo, inu olamulira dziko lino lapansi. Muzikhala ndi maganizo olongosoka pa kusinkhasinkha za Ambuye. Muzifunafuna Iwowo ndi mtima woona.

²Pajatu amene sapenekera Ambuye, amaŵapezadi, ndipo Ambuyewo amadziŵonetsa kwa anthu oŵakhulupirira.

³Maganizo opotoka amalekanitsa anthu ndi Mulungu, ndipo Iye amaŵachititsa manyazi anthu opusa, ofuna kupeputsa mphamvu zake.

⁴Luntha sililoŵa mu mtima wa munthu wonyenga, silikhala mwa munthu wogonjera machimo.

⁵Mzimu woyera, wophunzitsa anthu, umaŵathaŵa anthu onyenga, sukhalapo pamene pali maganizo opusa; umakhumudwa ndi makhalidwe osalungama.

⁶Luntha ndi mzimu wachifundo kwa anthu, koma sililekerera munthu wonyoza Mulungu mwachipongwe, chifukwa Mulungu amadziŵa zam'kati zonse, amafufuza za mumtima mwa munthu ndi kumva zimene amalankhula.

⁷Ndithudi, mzimu wa Ambuye wadzaza pa dziko lonse lapansi, umagwirizira zinthu zonse pamodzi, umadziŵa zonse zimene anthu amalankhula.

⁸Nchifukwa chake munthu wolankhula zoipa sangabisale, chilungamo sichidzalephera kumutsutsa.

⁹Munthu wonyoza Mulungu adzazengedwa mlandu pa zolinga zake, nkhani yake idzafika mpaka kwa Ambuye ndipo adzamutsutsa kuti ndi wopalamula ndithu.

¹⁰Khutu latcheru la Mulungu limamva zonse, limamva ngakhale madandaulo ong'ung'udza.

¹¹Tsono chenjerani kuti musamangoŵiringula pachabe, ndipo musakhale akazitape, chifukwa ngakhale zonena kuseri zimakhala ndi zotsatira zake, ndipo wokamba zonama amaononga moyo wamumtima.

¹²Musadziitanire imfa ndi mayendedwe anu oipa, kapena kudzigwetsera chiwonongeko ndi ntchito za manja anu.

¹³Mulungu sadapange imfa, sakondwera ndi imfa ya anthu amoyo.

¹⁴Iye adalenga zonse kuti zizikhalapo. Zolengedwa zonse za m'dziko lapansi nzabwino, zilibe ululu wopha anthu. Imfa ilibe ulamuliro pansi pano,

¹⁵chifukwa chilungamo chidzakhalapo mpaka muyaya.

¹⁶Koma anthu osamvera Mulungu amadziitanira imfa, chifukwa cha ntchito zao ndi mau ao. Amaisandutsa ngati bwenzi lao, ndipo amailakalaka kwabasi. Amachita nayo chipangano, motero ayeneradi kukhala m'gulu lake.