Read Buku Loyera - Chichewa Lun. 10 Bible Online

Lun. 10 - Buku Loyera - Chichewa bible

Lun. 10

¹Luntha linkasunga munthu woyamba, tate wa mtundu wa anthu, pamene anali yekha, Mulungu atamulenga. Munthuyo atachimwa, luntha lidamupulumutsa,

²ndipo lidamupatsa mphamvu zolamulira zolengedwa zonse.

³Koma pamene wina wosalungama adasiyana ndi luntha mwaukali, adaonongeka chifukwa cha kupha mbale wake mwachipseramtima.

⁴Pamene dziko lino lapansi lidaamira m'madzi chifukwa cha iyeyo, luntha lidaapulumutsa dzikolo poongolera olungama aja pa mtengo wachabechabe.

⁵Pamene mitundu ya anthu idasokonezeka itapangana kuti ichite choipa, luntha lidapatulapo munthu amene anali wolungama, nkumusunga wopanda cholakwa pamaso pa Mulungu. Lidamulimbitsanso kuti angafooke ndi chisoni chomvera mwana wake.

⁶Luntha lidapulumutsanso munthu wina wolungama pamene anthu oipa adaonongeka. Iyeyo adathaŵa moto umene udagwa pa mizinda isanu ija.

⁷Mboni ya kuipa kwao ndi nthaka youma imene sileka kufuka utsi, imene mbeu zake zimabereka zipatso zimene sizipsa. Ndipo chipilala chamchere chili pompo chikhalire, ngati chikumbutso cha mtima wosakhulupirira.

⁸Anthuwo atasiyana ndi luntha, sadathenso kuzindikira zabwino, koma adasiyira amoyo mbiri ya kupenga kwao, kuti zolakwa zao zizikumbukika nthaŵi zonse.

⁹Koma luntha lidapulumutsa atumiki ake m'zovuta zao.

¹⁰Munthu wolungama uja amene ankathaŵa ukali wa mbale wake, lidamuwongolera pa njira zolungama. Lidamuwonetsa ufumu wa Mulungu ndi kumudziŵitsa zinthu zoyera. Lidamupambanitsa pa ntchito zake zoŵaŵa ndipo lidachulukitsa phindu la ntchito zake.

¹¹Lidamutchinjiriza pakati pa anthu ofuna kumchenjerera, ndipo lidamulemeretsa.

¹²Lidamuteteza kwa adani ake, ndipo lidamupulumutsa pakati pa anthu ofuna kumutchera misampha. Lidamupambanitsa pa ndeu yolimbana koopsa, kuti aphunzire kuti kutumikira Mulungu kumalimbitsa munthu kupambana zonse.

¹³Munthu wina wolungama atagulitsidwa luntha silidamusiye, lidamutchinjiriza kuti asachimwe. Lidaloŵa naye ndi m'ndende momwe.

¹⁴Silidamusiye ali m'maunyolo, koma lidamupatsa ndodo yaufumu ndi mphamvu zolamulira eni ake ovuta a dzikolo. Anthu amene ankamuneneza, lidaŵatsutsa kuti ndi abodza, kenaka lidamupatsa ulemu wamuyaya.

¹⁵Luntha lidapulumutsa anthu oyera mtima ndi osachimwa kwa mtundu wa anthu oŵazunza.

¹⁶Lidaloŵa mu mtima wa mtumiki wa Ambuye, ndipo lidachita zizindikiro ndi zozizwitsa polimbana ndi mafumu oopsa.

¹⁷Anthu oyera mtima lidaŵapatsa malipiro a ntchito zao zoŵaŵa, lidaŵaongolera pa njira yodabwitsa. Masana linali ngati mthunzi wao, usiku linali ngati chilangali choŵala ngati nyenyezi.

¹⁸Lidaŵaolotsa Nyanja Yofiira, ndi kuŵapititsa pakati pa madzi ozama.

¹⁹Lidamiza adani ao pansi pa nyanja, kenaka nkuŵavuulira ku mtunda.

²⁰Motero anthu olungama adafunkha chuma cha anthu osamva aja. Adaimbira dzina lanu loyera Inu Ambuye, onse ndi mtima umodzi adatamanda dzanja lanu loŵateteza.

²¹Luntha lidatsekula pakamwa pa anthu osalankhula, lidamasula lilime la ana akhanda.