Read Buku Loyera - Chichewa Lun. 11 Bible Online

Lun. 11 - Buku Loyera - Chichewa bible

Lun. 11

¹Luntha lidapambanitsa Aisraele pa ntchito zao kudzera mwa mneneri woyera mtima.

²Adayenda m'chipululu chopanda anthu, namanga mahema ao pamalo pamene sipadapite anthu.

³Adalimbikira pamaso pa amaliwongo ao, nkuŵapambana adani aowo pa nkhondo.

⁴Atamva ludzu adakupemphani, Inu nkuŵapatsa madzi otumphuka m'thanthwe lolimba zedi, mudapha ludzu lao potulutsa madzi m'thanthwe lagwaa.

⁵Zimene zidasautsa adani ao ngati chilango, zidasanduka za phindu kwa eniakewo pa nthaŵi ya mavuto ao.

⁶M'malo mwa kasupe wa madzi oyenda nthaŵi zonse, adani ao adapeza madzi oonongeka, ataipa ndi magazi,

⁷ngati chilango chifukwa cha lamulo lao lija loti ana aphedwe. Koma anthu anu mudaŵapatsa madzi ochuluka, pamene iwo sankayembekezako.

⁸Zimenezo zidachitika mutaŵamvetsa ludzu, kuti adziŵe m'mene mudalangira adani ao.

⁹Pamene munkaŵayesa pakuŵalanga mwachifundo, iwo adaphunzira m'mene mudazunzira mwaukali anthu osamvera.

¹⁰Pajatu mudaŵayesa ndi kuŵapatsa phunziro, monga m'mene bambo amachenjezera ana ake. Koma ena aja mudaŵasautsa, monga momwe mfumu yankhanza imalangira osamvera.

¹¹Adani ao ankapezabe mavuto, ngakhale anthu anu atakhala pafupi kapena kutali.

¹²Chisoni chidaŵagwira moŵirikiza, ndipo ankabuula pokumbukira zimene zidaŵagwera kale.

¹³Pakumva kuti zilango zao zidathandiza anthu anu olungama, adaniwo adazindikira kuti zimenezi adaachita ndi Ambuye.

¹⁴Munthu uja amene iwowo adaamutaya kale lija kenaka nkumuchotsa monyoza, pambuyo pake adazizwa naye kwakukulu, chifukwa ludzu lao lidaapambana kwambiri la anthu olungama.

¹⁵Chifukwa cha maganizo ao opusa ndi oipa, amene adaŵasokeretsa mpaka kuŵapembedzetsa njoka ndi nyama zonyansa, mudaŵalanga pakuŵatumizira unyinji wa zolengedwa zinanso zopanda nzeru.

¹⁶Choncho mudaŵaphunzitsa kuti choipa chitsata mwini.

¹⁷Dzanja lanu lamphamvuzonse, limene lidapanga zinthu zonse kuchokera ku chinthu chosakonzeka, likadatha kuŵatumizira zilombo zochuluka ndi mikango yaukali.

¹⁸Likadathanso kuŵatumizira zilombo zina zosadziŵika, zolengedwa chatsopano, za ukali woopsa, zopuma mpweya wamoto, zotulutsa utsi wonunkha m'kamwa, kapena zoponya zing'aning'ani zoopsa kuchokera m'maso mwake.

¹⁹Zolusazo zikadatha kuwonongadi anthuwo, komanso ngakhale kungoziwona kokha kukadatha kupha anthuwo ndi mantha.

²⁰Ngakhale popanda zimenezo, anthuwo akadatha kufa, Inu mutangoŵauzira mpweya kamodzi kokha, poŵalondola ndi chilungamo chanu ndi kuŵamwaza ndi mpweya wanu wamphamvu. Koma Inu mudafuna kukonza zonse molongosoka, mutaziŵerenga ndi kuziyesa pa sikelo.

²¹Mphamvu zanu mutha kuzigwiritsa ntchito nthaŵi iliyonse. Ndani angalimbikire kulimbana ndi dzanja lanu?

²²Pamaso panu dziko lonse lapansi lili ngati kamchenga kopendeketsa sikelo, ngati dontho la mame am'mamaŵa logwa pa nthaka.

²³Komabe chifukwa mungathe kuchita zinthu zonse, mumaŵachitira chifundo anthu onse. Mumapsinya maso dala kuti musaone machimo a anthu, kuti apeze mpata wotembenukira mtima.

²⁴Mumakonda zolengedwa zonse, palibe ncholengedwa chimodzi chomwe chimene chingakunyanseni. Mukadadana ndi kanthu, bwenzi mutaleka kukalenga.

²⁵Kanthu kalikonse kakadakhala moyo bwanji, mukadapanda kukafuna? Kakadakhalitsa bwanji, Inu mukadapanda kukasunga?

²⁶Koma zinthu zonse mumazichitira chifundo, chifukwa zonse nzanu, Inu Ambuye, amene mumakonda kwambiri chamoyo chilichonse.