Read Buku Loyera - Chichewa Lun. 12 Bible Online

Lun. 12 - Buku Loyera - Chichewa bible

Lun. 12

¹Mzimu wanu wosafa umakhala m'zinthu zonse.

²Nchifukwa chake anthu akakunyozani, mumaŵalanga pang'onopang'ono. Mumaŵakumbutsa machimo ao ndi kuŵachenjeza kuti asiye zoipa ndi kukhulupirira Inu, Ambuye.

³Anthu akale amene ankakhala m'dziko lanu loyera

⁴mudadana nawo chifukwa cha zochita zao zonyansa, chifukwa cha zaufiti ndi miyambo ina yoipa.

⁵Ankapha ana mopanda chifundo, pa maphwando ao a nsembe zao ankadya nyama ya anthu ndi kumamwa magazi ao. Adaphunzitsidwa miyambo yonyansadi,

⁶anakubala ankapha ana opanda chitetezo. Inuyo mudagamula zoti makolo athu aononge anthu amenewo,

⁷kuti dziko limene munkalikonda kupambana maiko onse, lilandire fuko loyenera la ana a Mulungu.

⁸Komabe popeza kuti adaniwo anali anthu, mudaŵachitira chifundo. Ankhondo anu asanafike, mudatsogoza mavu ambiri kuti akaononge adaniwo pang'onopang'ono.

⁹Kunali kotheka kwa Inu kuwononga anthu osamverawo pakuŵayambanitsa nkhondo ndi anthu olungama, kapena kuŵatsiriza onse kamodzinkamodzi ndi zilombo, kapenanso ndi mau anu amodzi okha mopanda chisoni.

¹⁰Koma poŵalanga pang'onopang'ono, mudaŵapatsa mpata wolapira, chifukwa munkadziŵa bwino kuti adabadwa m'machimo. Kuipa kwao kunali kwachibadwa, ndipo maganizo ao anali osasinthika.

¹¹Unali mtundu wotembereredwa chiyambire. Ngakhale mudaaŵalekerera machimo ao osaŵalanga, sichinali chifukwa choopa wina aliyense ai.

¹²Ndani angakufunseni kuti, “Kodi mwachita chiyani?” Ndani angatsutsepo pa zogamula zanu? Ndani angakuimbeni mlandu chifukwa choti mwaononga mitundu ya anthu imene inu nomwe mudailenga? Ndani angabwere pamaso panu kudzaŵalankhulira mau oteteza anthu osamveraŵa?

¹³Pajatu Mulungu ndinu nokha, palibenso wina. Ndinu nokha amene mumasamala anthu onse. Palibenso wina amene muyenera kumufotokozera ngati chigamulo chanu ndi cholungama.

¹⁴Palibenso mfumu kapena muweruzi wina amene angathe kukudzudzulani pa za anthu amene mudaŵalanga.

¹⁵Ndinu olungama, mumayendetsa zinthu zonse molungama. Kwa Inu sizikugwirizana konse ndi mphamvu zanu kuti mulange munthu wosayenera kulangidwa.

¹⁶Mphamvu zanu ndiye gwero la chilungamo chanu, choncho popeza kuti ndinu mwini anthu onse, mumaŵachitira chifundo onse.

¹⁷Anthu amene amakayika kuti ndinu Mulungu Wamphamvuzonse, mumaŵaonetsa mphamvu zanu. Anthu amene amadziŵa zimenezi nkukuchitanibe chipongwe, mumaŵachititsa manyazi.

¹⁸Koma ngakhale ndinu mwini mphamvu, mumaweruza mofatsa. Mumatilamula ndi mtima wachifundo, poti mukangofuna, mumaonetsa mphamvu zanu.

¹⁹Pochita ntchito zanu zoterezi, mudaphunzitsa anthu anu kuti wolungama ayenera kukhala wachifundo, mudadzaza ana anu ndi chikhulupiriro, chifukwa mumakhululukira anthu ochimwa.

²⁰Ngati adani a ana anu mudaŵalanga mofatsa ndi moleza mtima, ngakhale ankayenera kuphedwa, mudaŵapatsa nthaŵi yosiya machimo ao pakutero,

²¹nanji tsono ana anu, iwowo mudaŵaweruza mosamala kopambana, Inu amene mudapereka kwa makolo ao malonjezo anu ndi chipangano chanu kuti mudzaŵapatsa madalitso ochuluka.

²²Ife mukamatilanga, adani mumaŵasautsa moŵirikiza, kuti tizilingalira bwino za chifundo chanu pamene tikuweruza ena, kuti Inu podzatiweruza, tidzathe kudalira chifundo chanu.

²³Tsono anthu openga aja, amene anali ndi makhalidwe oipa, mudaŵalanga ndi zoipa zao zomwe.

²⁴Iwo adasokera kwambiri ndi njira zao zonama, kotero kuti nyama zoipa ndi zonyansa kwambiri ankaziyesa milungu. Ankangokhulupirira zopusa ngati ana opanda nzeru.

²⁵Nchifukwa chake iwowo pokhala ngati ana opanda nzeru, mudaŵatumizira chilango chanu choŵaonetsa kuti ndi opusa.

²⁶Koma amene sadasamaleko madzudzulo ochenjezawo, adzalandira chilango choyenera kwa Mulungu.

²⁷Mutaŵalanga nazo zolengedwa zimene adaaziyesa milungu zija, adapsa nazo mtima zoŵazunzazo. Adaona ndi kuzindikira kuti Chauta ndiye Mulungu woona, Iye amene iwo adaakana kumuvomera. Nchifukwa chake chilango choopsa chidaaŵagwera.