Read Buku Loyera - Chichewa Lun. 14 Bible Online

Lun. 14 - Buku Loyera - Chichewa bible

Lun. 14

¹Wina pokonzekera kuwoloka nyanja yaukali, amapemphera mtengo umene uli wofooka kupambana chombo chomwe chamunyamula.

²Chombo adachiganiza ndi munthu wofuna phindu, mmisiri wanzeru, nkuchipanga ndi luso.

³Koma inu Atate, ndi chisamaliro chanu chimene chimayendetsa chombocho, poti ndinu amene mudachipatsa njira pakati pa nyanja ndiponso khwalala labwino pakati pa mafunde.

⁴Choncho mudatiwonetsa kuti mungathe kutipulumutsa m'mavuto aliwonse, kotero kuti ngakhale munthu wopanda luso lake angathe kuyenda pa nyanja.

⁵Simufuna kuti ntchito za nzeru zanu zikhale zopanda phindu. Choncho anthu saopa imfa ngakhale atakwera m'kabwato kofooka, amapita pa mafunde atakwera m'kabwato, mpaka kukafika ku mtunda.

⁶Pajatu ngakhale pachiyambi paja pamene ziphona zonyada zinkatayika, chikhulupiriro cha dziko lonse chidathaŵira m'chombo. Ndipo mutayendetsa chombocho ndi dzanja lanu, mudalisiyira dziko lapansi mbeu ya anthu a mbadwo watsopano.

⁷Zoonadi, ndi wotamandika mtengo wodzetsa chilungamo.

⁸Koma litembereredwe fano lopangidwa ndi manja a munthu, pamodzi ndi mmisiri wake yemwe, poti ndiye adalipanga ndi kutchula mulungu chinthu chimene chimaola.

⁹Mulungu amadana ndi anthu osamvera, amaipidwa nako kusamvera kwao.

¹⁰Pajatu chinthu chimene chidapangidwacho chidzalangidwira kumodzi ndi wochipanga.

¹¹Nchifukwa chake mafano a mafuko ena nawonso Mulungu adzaŵaononga, pakuti ngakhale adapangidwa ndi chinthu cholengedwa ndi Mulungu, amalakwitsa mitima ya anthu, ndiponso amakhala misampha yokola anthu opusa.

¹²Ganizo lopanga mafano ndiye chinali chiyambi cha dama limenelo. Moyo wa anthu udaonongeka chifukwa chakuyamba kupanga zoterezi.

¹³Pa chiyambi kunalibe mafano, ndipo sikuti adzakhalapo mpaka muyaya.

¹⁴Mafano adabwera pansi pano ndi anthu okhulupirira zachabe, nchifukwa chake Mulungu adaŵakonzera zoti aonongeke msanga.

¹⁵Bambo wina akuvutika ndi maliro a mwana wake, adapanga chithunzi cha mwanayo amene Mulungu adamtenga mwadzidzidzi. Chimene dzuloli chinali mtembo chabe, adayamba kuchipembedza ngati mulungu, ndipo adasiyira a m'nyumba mwake miyambo yachinsinsi, yachipembedzo ndi yachinamwali.

¹⁶Tsono ndi nthaŵi mazoloŵero oipawo adalimbika, nasanduka ngati lamulo, ndipo mafumu adalamula kuti anthu azipembedza zithunzi zosemasema.

¹⁷Amene sankatha kulemekeza mafumu pamaso pao, chifukwa choti anali kutali, ankayesetsa kukumbukira nkhope yao. Ndipo ankapanga chithunzi chofanafana ndi mfumu imene ankafuna kuilemekezayo. Choncho munthu amene ankakhala naye kutali, ankamlambira monga ngati ali naye pafupi.

¹⁸Kudzikuza kwa mmisiri kudakakamiza anthu osaidziŵa mfumuyo kuti afalitse chipembedzo chake.

¹⁹Iyeyo pofuna kukomera mfumuyo, adayesetsa ndithu kukometsa chithunzicho.

²⁰Tsono anthu ambirimbiri atakopeka ndi luso la ntchito yake, adayamba kuipembedza ngati mulungu mfumu yomwe poyamba ankangoilemekeza ngati munthu.

²¹Zimenezi anthu adakodwa nazo mu msampha, pakuti chifukwa cha matsoka kapena malamulo a mfumu, anthuwo ankatcha mwala kapena mtengo dzina lopatulika.

²²Pambuyo pake sikudakwanire kuti iwowo asokere posadziŵa zoona za Mulungu, koma ankakhalanso pa nkhondo yoopsa chifukwa cha kusadziŵako, ndipo tsoka lotere ankalitcha mtendere.

²³Chifukwa cha kupereka ana ao ku nsembe, kapena kuchita miyambo yachinsinsi ija, kapena kulola madyerero pamodzi ndi zokondweretsa zonyansa,

²⁴sankathanso kusunga ungwiro pa moyo wao ndi pa maukwati ao. Mwina munthu ankapha mnzake monyenga, mwina kumuvuta pochita chigololo ndi mkazi wake.

²⁵Ponseponse panali chisokonezo: magazi, kupha anthu, mabodza ndi kuchenjerera ena, kuipiratu, kusakhulupirirana, phokoso ndi kulumbira zonama.

²⁶Ankasokoneza anthu abwino, sankathokoza polandira zabwino, ankaipitsa mitima, ankachita zadama zamtundu, ndipo pa chikwati ankachita zosayenera, chigololo ndi zonyansa zina.

²⁷Chipembedzo cha mafano osatchulika, ndiye chiyambi cha zoipa zonse, gwero lake ndi mathero ake.

²⁸Anthu oŵapembedza mafanowo amasangalala kopengetsa, mwina amalosa zabodza. Mwina amachita zosalungama mwina amaphwanya msanga malonjezo olumbira.

²⁹Popeza kuti amakhulupirira mafano opanda moyo, saopa kuti nkupeza mavuto chifukwa cha malumbiro ao onama.

³⁰Koma chilango chidzaŵagwera chifukwa cha zinthu ziŵiri: Chifukwa adalakwira Mulungu kwakukulu potsata mafano, ndiponso chifukwa adachita monyenga malumbiro oipa, kunyoza chilungamo.

³¹Chimene chimalondola tchimo la munthu wosalungama si mphamvu za zinthu zimene amazitchula polumbira, koma ndi chilango choyenera chimene chimagwera anthu ochimwawo.