Read Buku Loyera - Chichewa Lun. 16 Bible Online

Lun. 16 - Buku Loyera - Chichewa bible

Lun. 16

¹Aejipito adalangidwa ndi zolengedwa zotere monga kudaŵayenera, adazunzikadi ndi zilombo zosaŵerengeka.

²M'malo mwa chilangocho, mtundu wa anthu anu mudauchitira chifundo. Ndipo pofuna kuthetsa nkhuli yao, mudaŵakonzera zinziri, chakudya chokoma.

³Aejipito aja, ngakhale ankafuna kudya, ataona tizilombo toŵazunza, adanyansidwa ndi zakudya zofunika zomwe, koma anthu anu atamva njala nthaŵi pang'ono, pambuyo pake adalandirako chakudya chokoma.

⁴Kunali koyenera kuti njala yaikulu isautse anthu aja ovuta mtundu wanu, koma anthu anu mudafuna kuti apenye chabe mavuto ogwera adani aowo.

⁵Pamene anthu anu ankasauka ndi ukali wa zilombo ndipo pamene ankafa, njoka zaululu zitaŵaluma, mkwiyo wanu sudapitirire.

⁶Iwo adavutika nthaŵi pang'ono ngati chenjezo chabe, ndipo adalandira pomwepo chizindikiro cha chipulumutso, choŵakumbutsa malamulo anu.

⁷Aliyense amene ankatembenukira chizindikirocho, ankapulumuka. Sindikuti chimene adachiwonacho ndicho chidaŵapulumutsa, koma ndi Inuyo amene muli mpulumutsi wa anthu onse.

⁸Pakutero mudaonetsa adani athu aja kuti ndinu amene mumapulumutsa ku zoipa zonse.

⁹Iwowo adafa chifukwa choŵaluma dzombe ndi nchenche, osapeza mankhwala opulumutsira moyo wao, chifukwa anali oyenera kulangidwa choncho.

¹⁰Koma ana anu, ngakhale mano a njoka zaululu sadathe kuŵatsiriza, chifukwa chifundo chanu chidzaŵathandiza ndi kuŵachiritsa.

¹¹Adalumidwa kuti azikumbukira mau anu, mudaŵachiritsa msanga, kuti angakuiŵaleni ndipo angapande kulandira chithandizo chanu.

¹²Si masamba, si mankhwala adaŵachiritsa, koma ndi mau anu, Inu Ambuye, amene amachiza matenda onse.

¹³Inu muli ndi mphamvu pa moyo ndi pa imfa, mumafikitsa anthu ku khomo la imfa, ndi kuŵabweza kuchokera kumeneko.

¹⁴Munthu amene ali woipa mtima angathe kupha munthu mnzake, koma sangathe kubweza mpweya utachoka, kapena kupulumutsa mzimu utaloŵa m'dziko la akufa.

¹⁵Kuthaŵa dzanja lanu nkosatheka.

¹⁶Anthu osamvera, okana kukudziŵani, adakwapulidwa ndi mphamvu za dzanja lanu. Mvula yamkuntho ndi yamatalala, ndiponso mvumbi wosakata, zidaŵasautsa, ndipo moto udaŵatentha.

¹⁷Chinali chinthu chozizwitsa kuti moto udayaka mwamphamvu ngakhale m'madzi momwe mozimitsa zonse, chifukwa zonse zapansipano zimachirikiza anthu olungama.

¹⁸Mwina ukali wa moto unkacheperapo kuti usapsereze tizilombo todzasautsa osamverawo, kuti motero adaniwo poona zimenezo, azizindikira chiweruzo cha Mulungu choŵalondola.

¹⁹Mwina moto unkayaka kwambiri ngakhale m'madzi momwe, kuti uwononge dzinthu dzonse dza dziko la anthu osamvera.

²⁰Pamalo pa zimenezi mudadyetsa anthu anu ndi chakudya cha angelo, mudaŵatumizira buledi wokonzeka kale wofumira kumwamba, popanda iwo kugwirapo ntchito. Chinali chakudya chosangalatsa ndi chokomera anthu onse, ngakhale a kukonda kosiyanasiyana.

²¹Chakudya chanucho chinkasonyeza kukoma mtima kwanu kosamalira ana anu. Chinali chokomera aliyense, ndipo kukoma kwake kunkasinthika malinga nkukonda kwa munthu aliyense.

²²Chipale ndi chisanu choundana chambee sizidasungunuke m'moto, kuti anthu anu azindikire kuti unali moto woyaka pakati pa matalala ndi pakati pa mvula, umene unkaononga dzinthu dza adani ao.

²³Koma moto womwewo unkaiŵala khalidwe lake, kuti olungama zakudya zao zisaonongeke.

²⁴Zoonadi, zolengedwa, potumikira Inu Mlengi wake, zimalimbikira kuti zilange anthu oipa, koma zimakhululuka ndi kuŵachitira zachifundo anthu okhulupirira Inu.

²⁵Choncho, nthaŵi yakaleyo, potenga maonekedwe osiyanasiyana, zolengedwazo zinkathandiza ufulu wanu wolera onse, potsata khumbo la anthu okupemphani.

²⁶Tsono ana anu amene mumaŵakonda, Inu Ambuye, adatha kuphunzira kuti si zokolola zokha zimene zingadyetse anthu, koma ndi mau anu amene amasunga anthu okukhulupirirani.

²⁷Zimene sizidaonongeke ndi moto, zidasungunuka ndi chitungu cha pakanthaŵi, cha mwendo umodzi wa dzuŵa.

²⁸Choncho tidziŵe kuti tiyenera kudzuka ndi kukuyamikani, dzuŵa lisanatuluke, ndipo tiyenera kupemphera kwa Inu nthaŵi yomwe ya mbandakucha.

²⁹Koma munthu wosathokoza, chikhulupiriro chake chidzasungunuka ngati chipale, ndi kutayika ngati madzi opanda ntchito.