Read Buku Loyera - Chichewa Lun. 17 Bible Online

Lun. 17 - Buku Loyera - Chichewa bible

Lun. 17

¹Maweruzo anu ngapatali ndi osafotokozeka, nchifukwa chake mitima yosaphunzira idasokera.

²Pamene anthu osamvera aja ankaganiza kuti tsopano azunza anthu anu mu ukapolo, eniakewo anali okodwa ndi mdima ndi omangidwa mu usiku wautali. Anali ngati otsekedwa m'nyumba mwao ndi osoŵa chisamaliro chamuyaya cha Mulungu.

³Pamene ankaganiza kuti machimo ao, amene adaŵachita paseri, anali osadziŵika ndi oiŵalika, monga zinthu zochitikira kobisika, eniakewo adamwazikana ndi kuchita mantha kwambiri, ndipo adavutika poona mizukwa.

⁴Ngakhale m'chipinda m'mene adaathaŵiramo sadaleke kuchita mantha, chifukwa phokoso lodabwitsa linkamveka ponse pozungulira. Ndipo mizukwa yoopsa ya nkhope zoipa inkaŵaonekera.

⁵Moto unalibenso mphamvu zoŵaunikira, ngakhale kuŵala kwa nyenyezi kudalephera kuŵalitsa usiku woopsawo.

⁶Chokhacho chimene chinkaŵaonekera chinali moto woopsa, wobuka wokha, ndipo maonekedwe ake akamazimirira, chifukwa cha mantha ankayesa kuti zimene ankaziwonazo, zinali zoipa koposa.

⁷Luso lao lamatsenga lidaoneka lopandapake, ndipo amene ankadziyesa anzeru, adatsutsidwa mochititsa manyazi.

⁸Iwo ankati adzachiritsa mitima yamantha ndi yoda nkhaŵa, koma ndiwo amene adadwala ndi mantha opusa.

⁹Chifukwa ngakhale kunalibe kanthu koti nkuŵachititsa mantha, komabe zilombo zongoyenda ndi njoka zolira mozaza zinkaŵaopsa,

¹⁰ndipo ankangouma ndi mantha; ankayesa kuleka nkuphenyula maso komwe, koma kunali kosatheka.

¹¹Anthu ochimwa kaŵirikaŵiri ndi amantha umboni wao womwe umaŵatsutsa. Munthu woipa, mtima wake umamvuta ndi kukuza zomusautsa.

¹²Mantha si kanthu kena koma kulephera kulandira chithandizo chochokera ku luntha.

¹³Ndipo kusoŵa chithandizoku kukakula, kumaonjeza mantha a anthu osadziŵa chimene chikudzetsa zoŵazunza.

¹⁴Iwo aja ankagona tulo timodzimodzi nthaŵi yonse ya mdima umene unkafumira ku dziko lozama la akufa, kwenikweni mdimawo unalibe mphamvu pa iwo.

¹⁵Koma iwo mwina ankayesa kuti mizukwa yoopsa ikuŵapirikitsa. Mwinanso thupi lao linkauma ndi kusoŵa mphamvu, chifukwa mantha adzidzidzi ndi osadziŵika ankaŵagwera.

¹⁶Tsono aliyense amene anali pamenepo ankagwa pansi, anali ngati womangidwa m'ndende yopanda chitseko.

¹⁷Ngakhale mlimi, kapena mbusa, kapenanso munthu wogwira ntchito m'thengo, onsewo zoipazo zidaŵagwera, sadathe konse kuzilewa, chifukwa onse adaamangidwa ndi unyolo umodzi wa mdima womwewo.

¹⁸Kuwomba kwa mphepo, kuimba kokoma kwa mbalame pa nthambi zogudira, mkokomo wa madzi oyenda mwamphamvu,

¹⁹kapena phokoso lomveka kutali la mathanthwe ogumuka, kuthamanga kwa nyama zolumpha koma zosaoneka, kubangula kwa zilombo zoopsa, ndiponso mamvekera omveka m'mapanga a mapiri, zonsezo zidaŵaumitsa ndi mantha.

²⁰Nthaŵi imeneyo pa dziko lapansi pano panali kuŵala kokoma, ndipo anthu ankagwira ntchito zao mosavutika.

²¹Ochimwa okha anali pakati pa mdima wandiweyani, umene unkafanizira mdima wodzaŵagwera tsiku lina. Komabe iwo omwe ankadzilemeza koposa mdimawo.