Read Buku Loyera - Chichewa Lun. 18 Bible Online

Lun. 18 - Buku Loyera - Chichewa bible

Lun. 18

¹Koma kuyera kwakukulu kudaŵalira oyera anu. Aejipito adamvadi mau ao, ngakhale sadaone nkhope zao, ndipo adaŵatcha odala, popeza kuti analibe kanthu koŵavuta.

²Ndiye popeza kuti ana anuwo sadalipsire pa mavuto ao, Aejipito ankaŵathokoza naŵapempha kuti aŵakhululukire zolakwa zao zija.

³Tsono pamalo pa mdima, Inu mudapatsa ana anu mtambo wamoto, kuti uŵatsogolere pa njira yosaidziŵa iwowo. Unali ngati dzuŵa losaŵavuta pa ulendo wao wotchuka uja.

⁴Adani ao adayeneradi kuŵachotsera kuŵala ndi kuŵatsekera mu mdima, chifukwa adaaponya ana anu m'ndende. Ana anuwo ndiwo amene anali odzapereka kuŵala kwamuyaya kwa malamulo anu kwa anthu a dziko lapansi.

⁵Iwo aja adafuna kupha ana a anthu anu oyera. Koma mwana mmodzi uja ataikidwa pa madzi a mtsinje nkupulumuka, Inu mudaŵalanga anthuwo pakupha ana ao ambirimbiri. Ndipo mudaŵamiza onse pamodzi m'mafunde aukali.

⁶Usiku umenewo makolo athu anali ataudziŵiratu, kuti azilimba mtima ndi kukondwa podziŵa kuti apherezera malumbiro aja ankaŵakhulupiriraŵa.

⁷Choncho anthu anu ankayembekeza chipulumutso cha olungama ndiponso chiwonongeko cha adani ao.

⁸Njira yomwe mudalangira adani athu, idakhala njira yoti mutichitire ife zaulemu potiitana kwa Inu.

⁹Adzukulu oyera mtima a olungama aja ankapereka nsembe mobisala. Ankavomerezana kuti adzasunga malamulo a Mulungu ndi kugaŵana molingana zinthu zimodzimodzi, kaya zikhale madalitso, kaya zoopsa. Motero adaayambiziratu kuimba nyimbo zotamanda za makolo ao.

¹⁰Koma nthaŵi yomweyo konsekonse kudamveka mfuu wosokonezeka wa adani ao akulira ana ao.

¹¹Kapolo ndi mbuye wake adalandira chilango chimodzi, munthu wamba adavutika chimodzimodzi monga mfumu.

¹²Onsewo anali ndi maliro osaŵerengeka a amene adafa imfa imodzimodzi. Sipadatsale amoyo okwanira oti nkuika maliro onsewo, chifukwa ana ao amene iwo ankanyadira kwambiri adafa kamodzinkamodzi.

¹³Adakana kukhulupirira chilichonse chifukwa cha masenga ao, koma pamene adafa ana ao oyamba, anthuwo adazindikira kuti mtundu wa anthu anu unalidi wa ana a Mulungu.

¹⁴Pamene zinthu zonse zinali chete, ndipo usiku utafika pakati pake,

¹⁵mau anu amphamvu adalumpha kuchokera kumwamba ku mpando wachifumu, kudzagwa m'dziko lotembereredwa ngati wankhondo wopanda chisoni.

¹⁶Wokhala ndi lupanga lakuthwa la lamulo lanu losasinthika, adaima ndi kudzaza dziko ndi imfa, mapazi ake ataponda pansi, mutu wake utakhudza ku thambo.

¹⁷Pompo maloto oopsa adaŵachititsa mantha, zinthu zozilota ndi zoziwona m'masomphenya zidaŵaopsa.

¹⁸Atagwa pansi, wina uku, wina uku, nkukhala ngati akufa, aliyense adaulula zifukwa zake zimene ankafera.

¹⁹Maloto aja amene adaŵavuta anali ataŵadziŵitsiratu zimenezo, kuwopa kuti angafe osazindikira chifukwa chake cha mazunzo ao.

²⁰Ngakhalenso anthu olungama omwe, imfayo idaŵakhudza, ndipo m'chipululu muja mliri udagwetsa ambiri. Koma mkwiyo wanu sudakhalitse nthaŵi yaitali.

²¹Munthu wina wosapalamula adafulumira kuŵatchinjiriza, ndipo atatenga zida za utumiki wake, adapemphera ndi kufukiza lubani wopepesera machimo. Motero adaletsa ukali wanu, nathetsa mliri uja, kuwonetsa kuti analidi mtumiki wanu.

²²Adaletsa ukali wanuwo, osati chifukwa cha nyonga za thupi, kapena chifukwa cha mphamvu za zida, koma adafeŵetsa mtima wa wolangayo ndi mau ake, pomukumbutsa malumbiro ake ndiponso zimene adaapangana ndi makolo athu.

²³Akufa aja atagwa ndi kuunjikika pa mulu umodzi, iye adanenera anthu naletsa ukali wanu, ndipo adautsekera njira kuti amoyo usaŵagwere.

²⁴Pamkanjo pake panali chithunzi cha dziko lonse lapansi, maina olemekezeka a makolo athu anali olembedwa pa mizere inai ya miyala ya mtengo wapatali. Tsono ulemerero wanu unkaoneka pa chisoti cha pamutu pake.

²⁵Poona zimenezo, woononga uja adaima, ankachita nazo mantha, chifukwa kunkakwanira kuwonetsa chitsanzo cha ukali wanu.