Read Buku Loyera - Chichewa Lun. 19 Bible Online

Lun. 19 - Buku Loyera - Chichewa bible

Lun. 19

¹Koma anthu osamvera Mulungu adavutika nawo mpaka kutha kwake ukali wanu wopanda chisoni. Chifukwa Mulungu adaadziŵiratu zochita zao zakutsogolo.

²Adaadziŵa kuti ngakhale iwowo adaaloleza anthu anu kupita, naŵafulumizitsa kunyamuka, pambuyo pake adzasintha maganizo nadzaŵalondola.

³Ndipo ndithudi ngakhale ankatanganidwabe ndi maliro ao, ndi kulira ku manda a anthu ao akufa, adavomera maganizo ena amsala. Adalondola ngati anthu othaŵa anthu aja amene iwo omwe adaapempha kuti achoke.

⁴Tsoka loŵayenera lidaŵaganizitsa cholinga chimenechi ndi kuŵaiŵalitsa zoipa zimene zidaaŵagwera, kuti choncho chikwanire kwenikweni chilango chimene chinali chitapereŵera pa mazunzo ao.

⁵Pamenepo mudafunanso kuti anthu anu apitirire ulendo wao wodabwitsa, adaniwo apeze imfa yozizwitsa.

⁶Kakhalidwe ka zolengedwa zonse kadasanduka katsopano potsata lamulo lanu, kuti ana anu asapeze choŵaŵa chilichonse.

⁷Padaoneka mtambo wophimba zithando zao, pamene panali madzi okhaokha padatuluka mtunda wouma. Padapezeka njira yosavuta pakati pa Nyanja Yofiira, ndiponso chigwa cha msipu pamalo pa mafunde aukali.

⁸Tsono amene dzanja lanu linkaŵateteza aja, onse ngati fuko limodzi, adadzera pamenepo ali kuyang'anitsitsa zozizwitsa zanu.

⁹Ankayenda mokondwa ngati akavalo pa busa lao, ankalumphalumpha ngati anaankhosa, nkumakutamandani Inu Ambuye mpulumutsi wao.

¹⁰Ankakumbukira zamakedzana zimene zidaaŵaonekera ku dziko laukapolo, kuti pamalo pa zifuyo, dziko lidaabereka udzudzu, pamalo pa nsomba, mtsinje udaatulutsa achule ochuluka.

¹¹Pambuyo pake adaonanso mbalame za mtundu watsopano, pamene nkhuli yao idaŵakankha kupempha chakudya chokoma kwambiri.

¹²Pamenepo zinziri zidatuluka ku nyanja, kuti azidye nkukhuta.

¹³Koma chilango chidaŵagwera anthu ochimwa, ataŵachenjeza ndi zing'aning'ani. Adalangidwa moyenerana ndi kuipa kwao, chifukwa adaonetsa alendo chidani choopsa.

¹⁴Paja anthu ena ankakana kulandira alendo akangofika kwa iwo, koma iwowo adasandutsa akapolo alendo amene ankaŵachitira zabwino.

¹⁵Si pokhapo ai, koma oyambawo chilango chamtundu chidzaŵagwera chifukwa cholandira alendo moipa.

¹⁶Koma anthu enaŵa amene poyamba adalandira anthu anu ndi chimwemwe, nagaŵana nawo zabwino zao, pambuyo pake adaŵasautsa ndi ntchito zoŵaŵa.

¹⁷Ochimwawo adaŵalanganso pakuŵapatsa khungu, monga oyamba aja, amene ankazinga pakhomo pa wolungama. Pamene paja mdima wandiweyani utaŵaphimba, aliyense ankafunafuna njira ya kukhomo kwake.

¹⁸Zolengedwa zidasinthana kakhalidwe, monga poliza limba, chingwe chilichonse chili ndi liwu lakelake, koma kaimbidwe nkosiyana. Zimenezi zimaoneka bwino poyang'ana zimene zidaachitika.

¹⁹Nyama zapamtunda zidaasanduka zam'madzi, zosambira m'madzi zidaatulukira ku mtunda.

²⁰Moto udaasunga mphamvu yake ndi m'madzi momwe, ndipo madzi adaaiŵala mphamvu zake zozimitsa moto.

²¹Mwina malaŵi a moto sadapsereze minofu ya tizilombo todutsa pakati pake, sadasungunule chakudya chofeŵa chakumwamba chosakhalira kusungunuka chija.

²²Inu Ambuye, mudakuza ndi kuupatsa ulemerero mtundu wa anthu anu pa zonse. Simudaleke kuuthandiza nthaŵi zonse ndi pamalo ponse.