Read Buku Loyera - Chichewa Lun. 2 Bible Online

Lun. 2 - Buku Loyera - Chichewa bible

Lun. 2

¹Anthu osamvera Mulungu amaganiza molakwa kuti, “Moyo wathu ndi wochepa ndiponso womvetsa chisoni.” Nthaŵi ya imfa ikafika, palibe mankhwala oti nkumupulumutsa munthu. Monga tikudziŵira, palibe ndi mmodzi yemwe amene adabwerako ku dziko la akufa.

²Tidangobadwa mosayembekezeka, pambuyo pake tidzangoti zii, monga ngati sitidakhale konse ndi moyo. Mpweya wa m'mphuno mwathu uli ngati utsi, nzeru zathu zili ngati mbaliŵali ya moto, yofumira mu mtima wathu pamene ukugunda.

³Mbaliŵaliyo itazima, thupi lathu lidzasanduka ngati phulusa, mpweya wathu udzazimirira ngati nkhungu.

⁴Kanthaŵi pang'ono ndipo dzina lathu lidzaiŵalika, palibe amene adzakumbukire zimene tidachita. Moyo wathu udzapita ngati mtambo wouluzika, udzatha ngati nkhungu yomwazikana nkuŵala kwa dzuŵa, yozimirira nkutentha kwa dzuŵalo.

⁵Nthaŵi yathu yokhala pansi pano ili ngati mthunzi wongodutsa. Tikafa tapita chonse, chifukwa pamanda pamakhala pokhoma, ndiye palibe amene amabwerako.

⁶Anthu osamvera aja amati, “Tiyeni tsono tikondwerere zabwino zoterezi, tilidyere dziko ndi kukhutiratu monga tinkachitira nthaŵi yaunyamata.

⁷Timwe vinyo wokoma mpaka kuledzera, tidzole zonunkhira zamtengowapatali. Tisaleke kukondwerera maluŵa a nthaŵi yachilimwe.

⁸Tivale nsangamutu za mphundu za maluŵa zisanafote.

⁹Wina aliyense mwa ife asalephere kufika ku madyerero athu. Tisiye zizindikiro za chisangalalo ponseponse, chifukwa chimenechi ndiye chigawo chathuchathu chokhalira ifeyo.

¹⁰“Munthu wolungama amene alibe chuma, tiyeni timuzunze. Mkazi wamasiye tisamuchitire chifundo, munthu wokalamba, imvi zili mbu, tisamulemekeze.

¹¹Kwa ifeyo kuti tikhale achilungamo, koma tiwonetse mphamvu zathu, pakuti amene alibe mphamvu ndiye kuti ngwopanda ntchito.

¹²Tsono timukhalizire munthu wolungama, popeza kuti amativutitsa, ndipo amatsutsana ndi ntchito zathu. Amatidzudzula chifukwa chopandukira malamulo, amatinena kuti timanyoza mwambo.

¹³Iye akuti ati amadziŵa Mulungu, ndipo amadzitchula mwana wa Ambuye.

¹⁴Tikamuwona timamva kudzudzulidwa m'maganizo mwathu, tikangomuti tha, ife pomwepo khwinya.

¹⁵Iye uja makhalidwe ake safanafana ndi a anthu ena, machitidwe ake ndi amtundu.

¹⁶Amatiyesa ife anthu onyozeka, amapewa machitidwe athu ngati zinthu zonyansa. Amaganiza kuti imfa ya munthu wolungama ndi yodalitsidwa, amanyadira kuti Mulungu ndi atate ake.

¹⁷Tiyeni tiwone ngati mau ake ndi oona, tiwone zimene zidzamufikire pakutha pa moyo wake.

¹⁸Ngati wolungamayo ndi mwanadi wa Mulungu, Mulungu adzamuthandiza, adzampulumutsa kwa adani ake.

¹⁹Timuyese pakumusautsa ndi kumunyoza, kuti tiwone ngati ndi munthu wofatsa, ngati ndi wodziŵa kupirira.

²⁰Timpereke ku imfa yochititsa manyazi, paja iye akuti Mulungu adzamteteza.”

²¹Anthu oipa amaganiza zimene tanenazi, koma ndi maganizo osokera, kuipa kwao kumangoŵachititsa khungu.

²²Sadziŵa maganizo obisika a Mulungu. Sakhulupirira malipiro a moyo wolungama. Sazindikira konse kuti ilipodi mphotho ya anthu oyera mtima.

²³Ndithu Mulungu adalenga anthu kuti akhale osafa, adaŵapanga kuti akhale chifaniziro cha m'mene aliri Mwiniwakeyo.

²⁴Koma imfa idaloŵa m'dziko lino lapansi chifukwa cha dumbo la Satana. Izi ndi zomwe anthu ogwirizana naye Satanayo adzaonadi.