Read Buku Loyera - Chichewa Lun. 3 Bible Online

Lun. 3 - Buku Loyera - Chichewa bible

Lun. 3

¹Koma mizimu ya anthu olungama ili m'manja mwa Mulungu ndipo masautso sadzaigwera konse.

²Pamaso pa anthu opusa, ankaoneka ngati adafa, ndipo imfa yao inkaoneka ngati tsoka lalikulu.

³Kutisiya kwaoko kunali ngati kuwonongekeratu, pamene eniakewo ali pa mtendere.

⁴Ngakhale pamaso pa anthu ankaoneka ngati olangidwa, koma eniake anali ndi chikhulupiriro chosatha.

⁵Atalangidwa pang'ono, adzaona madalitso aakulu, chifukwa Mulungu ankangoŵayesa, ndipo adaŵapeza kuti ndi oyenera kukhala naye.

⁶Adaŵayesa ngati golide m'ng'anjo ya moto, ndipo adaŵavomera monga momwe amavomerera nsembe zopsereza.

⁷Mulungu akadzaŵayendera, iwowo adzaŵala, ndipo adzathamanga monga amachitira malaŵi a moto pakati pa udzu wouma.

⁸Iwo adzaweruza mitundu ya anthu ndi kulamulira anthu onse, ndipo Ambuye adzakhala mfumu yao mpaka muyaya.

⁹Amene amamukhulupirira adzamvetsa zoona, ndipo amene amalimbikira adzakhala naye m'chikondi chake, chifukwa Iye amachitira ufulu ndi chifundo anthu ake osankhidwa.

¹⁰Koma anthu osamvera Mulungu, amene adanyoza munthu wolungama, naukira Ambuye, adzalandira chilango molingana ndi maganizo ao oipawo.

¹¹Pajatu anthu onyoza nzeru ndi mwambo ali ndi tsoka. Chikhulupiriro chao ndi chopandapake, ntchito zao ndi zachabechabe, kukangalika kwao nkopanda ntchito, zochita zao nzopanda phindu.

¹²Anthu otere akazi ao ndi opusa, ana ao ndi oipa kwambiri, zidzukulu zao nzotembereredwa.

¹³Nchifukwa chake ngwodala mkazi wosabereka, amene ali woyera mtima, ndipo sadachimwepo ndi amuna. Adzakhala ndi zipatso pamene Mulungu adzaweruza mizimu.

¹⁴Ngwodalanso mwamuna wofulidwa, amene manja ake sadachite zoipa, ndi amene sadaganize zochimwira Ambuye. Ameneyo adzalandira mphotho yapadera chifukwa cha kukhulupirika kwake, ndipo adzapeza malo okondweretsa kwambiri m'Nyumba ya Ambuye.

¹⁵Ntchito zabwino zotsatira zake ndi ulemerero, luntha lili ngati muzu wamoyo umene sulephera kuphukira.

¹⁶Koma ana a anthu achigololo sadzalimba, ana a ukwati wosayenera adzazimirira.

¹⁷Ngakhale moyo wao ukhale wa zaka zambiri, adzaŵayesa anthu achabechabe, potsiriza, ukalamba wao sudzalemekezeka.

¹⁸Ngati afa akali achinyamata, adzakhala opanda chikhulupiriro ndi osasangalala pa tsiku la mlandu,

¹⁹chifukwa mtundu wosalungama umatha moopsa.