Read Buku Loyera - Chichewa Lun. 4 Bible Online

Lun. 4 - Buku Loyera - Chichewa bible

Lun. 4

¹Ndibwino koposa kukhala wosabereka koma uli wachilungamo, chifukwa kulungamako anthu amakukumbukira mpaka muyaya, kumavomerezedwa ndi Mulungu ndi anthu omwe.

²Mkhalidwe wotere ukakhalapo, timautsanzira, koma ukakhala palibe, timaulakalaka. Mpaka muyaya udzayenda patsogolo, utavala chisoti chaulemerero, chifukwa udapambana pa nkhondo ya kulimbana ndi zoipa.

³Koma ana ochuluka a anthu osamvera adzakhala opandapake. Poti adabadwira m'chigololo, sadzazika mizu mozama, sadzakhala ndi maziko olimba.

⁴Ngakhale aphuke nthambi pa kanthaŵi, masinde ao osalimba adzagwedezeka ndi mphepo, mphepo yamkuntho idzaŵazula.

⁵Nthambi zao zidzathyoka zisanakhwime, zipatso zao zidzakhala zosadyeka, chifukwa ndi zosapsa bwino ndipo ndi zopandapake.

⁶Ana obadwira m'chigololo amakhala mboni zotsutsa makolo ao pamene Mulungu aweruza mlandu wao.

⁷Koma munthu wolungama, ngakhale afe msanga, adzapeza chiwuso.

⁸Timalemekeza nkhalamba osati chifukwa cha kutalika kwa moyo kapena kuchuluka kwa zaka,

⁹koma nzeru ndiye imvi za munthu, moyo wosalakwa ndiye ukalamba wake.

¹⁰Panali munthu wina amene adaakomera Mulungu, ndipo Mulungu adaamukonda. Tsono pamene ankakhala pakati pa anthu ochimwa, Mulungu adamtenga.

¹¹Adamtengako kuti nsanje ingaipitse luntha lake, chinyengo chingachimwitse mtima wake.

¹²Chifukwa kukopeka ndi zoipa kumadetsa m'maso, zilakolako zamitundumitundu zimaipitsa ngakhale mtima wolungama.

¹³Koma iyeyo pa nthaŵi yochepa adasanduka wangwiro, nakwaniritsa moyo wa zaka zambiri.

¹⁴Mtima wake udakomera Ambuye, nchifukwa chake Ambuyewo adamuchotsa msanga pakati pa zoipa.

¹⁵Anthu ankapenya zimenezi, komabe sadazimvetse, ndipo sadazisamale. Sadazindikire kuti Mulungu amakomera mtima osankhidwa ake, ndi kuŵachitira chifundo, ndikutinso amatchinjiriza anthu ake oyera mtima.

¹⁶Koma olungama amene afa amatsutsa amene akali moyo koma ali osamvera. Ndipo anyamata oyera mtima otsirizika msanga amatsutsa okalamba a zaka zambiri pamene iwo ali osalungama.

¹⁷Anthu amaona kutha kwa munthu wolungama, koma osamvetsa cholinga cha Chauta chakuti imeneyi ndiye njira yomutchinjirizira ku zoopsa.

¹⁸Anthu amamuwona nkumamunyoza, koma Ambuye adzaŵanyodola iwowo. Iwowo akadzafa, maliro ao adzakhala osalemekezeka, adzanyozeka nthaŵi zonse ngakhale pakati pa anthu akufa omwe.

¹⁹Ndithudi Ambuye adzaŵakantha nkuŵagwetsa chadodolido, iwowo pansi thi osanena kanthu. Maziko ao adzagwedezeka, anthu onsewo adzakhala ngati nthaka youma yosabereka kanthu. Adzamva mazunzo, ndipo maina ao sadzakumbukikanso.

²⁰Pamene azidzaŵerengera machimo ao, anthu ochimwawo adzabwera ali ndi nkhaŵa, ndipo zoipa zaozo zidzaŵaukira nkuŵatsutsa.