Read Buku Loyera - Chichewa Lun. 6 Bible Online

Lun. 6 - Buku Loyera - Chichewa bible

Lun. 6

¹Tamvani tsono inu mafumu, ndipo mumvetse bwino. Phunzirani inu oweruza dziko lonse lino lapansi.

²Tcherani khutu, inu olamulira makamu a anthu, inu amene mumanyadira kuweruza unyinji wa mafuko.

³Mphamvu zanu adakupatsani ndi Ambuye. Wopambanazonse ndiye amene adakupatsani ulamuliro. Ndiye amene adzayang'anitsitsa ntchito zanu ndi kusanthula maganizo anu.

⁴Tsono ngati inu, atumiki a Ufumu wake, simudaweruze mwachilungamo, ngati simudamvere malamulo, ndipo ngati simudatsate kufuna kwa Mulungu,

⁵Iye adzakufikirani moopsa ndi mwadzidzidzi, chifukwa mlandu umakhala woopsa kwa anthu olamulira anzao.

⁶Anthu wamba adzaŵachitira chifundo ndi kuŵakhululukira, koma anthu amphamvu adzafufuza kwambiri ntchito zao.

⁷Ambuye, mwini zinthu zonse, saopa ndi mmodzi yemwe. Saŵerengera kuti uyu ndi wamkulu, chifukwa ndiye amene adalenga akuluakulu ndi ang'onoang'ono omwe, onse amaŵasamala chimodzimodzi.

⁸Koma amene ali ndi mphamvu, Iye adzayang'anitsitsa kwambiri ntchito zao.

⁹Tsono inu mafumu, mau angaŵa akukhalira inu, kuti muziphunzira luntha, osalekana nalo.

¹⁰Adzaŵaŵerengera kuti ndi oyera mtima amene amatsata malamulo olungama ndi mtima wabwino. Amene adaŵaphunzira, adzatetezedwa nawo.

¹¹Tsono funafunani mau anga, muziŵakhumbira, ndipo mudzakhala ndi luntha.

¹²Luntha ndi loŵala, lilibe mdima. Kwa olikonda, nkwapafupi kuliwona, olifunafuna amalipeza.

¹³Limadziwonetsa mwamsanga kwa anthu olifuna.

¹⁴Munthu wodzuka m'mamaŵa kuti alifune, sadzavutika, adzalipeza litakhala kale pakhomo pake.

¹⁵Kuikapo mtima pa za luntha ndiye kumvetsa bwino zinthu. Munthu wochita changu polifunafuna, adzaona msanga mtendere wamumtima.

¹⁶Pajatu limayendayenda kufunafuna oyenera kulilandira, limadziwonetsa kwa iwowo m'njira zao, limapezekanso ndi m'maganizo ao omwe.

¹⁷Luntha limayamba nkufunitsitsa kuphunzira, kutekeseka ndi maphunziro ndiye kukonda luntha.

¹⁸Kulikonda ndiye kumvera malamulo ake, kutsata malamulo akeko kumafikitsa ku moyo wosatha,

¹⁹moyo wosathawo umafikitsa munthu pafupi ndi Mulungu.

²⁰Choncho kulakalaka luntha kumafikitsa ku ufumu.

²¹Tsono ngati inu, mafumu a mitundu ya anthu, mumakondwerera mipando yanu ndi ndodo zanu zaufumu, mulemekeze luntha, kuti ufumuwo muzikhala nawo nthaŵi zonse.

²²Nanga luntha nchiyani? Ndipo lidayamba bwanji? Ndikufotokozerani, sindikubisirani kanthu, ndililongosola mwatsatanetsatane kuchokera pa chiyambi chake. Ndilifotokoza momveka, osasiyapo choona china chilichonse.

²³Sindikhala ndi nsanje pofotokoza zimenezo, chifukwa nsanje siyanjana ndi luntha.

²⁴Anthu aluntha akachuluka, amadzetsa chipulumutso pa dziko lino lapansi, mfumu yaluntha imadzetsera anthu ake mtendere.

²⁵Tsono phunzirani zimene nditi ndikuuzeni, mukatero mudzapezapo phindu.