Read Buku Loyera - Chichewa Lun. 7 Bible Online

Lun. 7 - Buku Loyera - Chichewa bible

Lun. 7

¹Ine ndemwe ndine munthu woti ndidzafa monga anthu ena onse. Ndine chidzukulu cha munthu woyamba uja, amene adampanga ndi dothi uja. Thupi langa lidapangidwa m'mimba mwa amai anga.

²Pa miyezi khumi magazi a amaiwo adalimbitsa thupi langali. Ndidafumira m'mbeu ya mwamuna ndi m'chisangalatso cha ukwati.

³Inenso nditabadwa, ndidayamba kupuma mpweya monga wa ana onse, ndidagwa pansi pamene amaponda anthu onse. Ndipo monga anzanga onse, mau anga oyamba anali olira.

⁴Adandifunditsa nsalu ndi kundilera mondisamala.

⁵Palibe mfumu ndi imodzi yomwe imene idaona chiyambi china cha moyo wake,

⁶Mabadwidwe onse ndi amodzi, mafedwenso ndi amodzi.

⁷Tsono ine ndidapemphera, ndipo adandipatsa nzeru. Ndidapemphera kwa Mulungu, ndipo mzimu wa luntha udaloŵa mwa ine.

⁸Ndinkakonda luntha kupambana ndodo yaufumu ndi mipando yachifumu, chuma ndidachiyesa chachabe nditachilinganiza ndi luntha.

⁹Sindidalilinganize ndi miyala yamtengowapatali, chifukwa golide yense wa pansi pano ndi kamchenga chabe pafupi ndi luntha, ndipo siliva ali ngati fumbi poyerekeza ndi luntha.

¹⁰Ndinkakonda luntha kupambana moyo ndi kukongola. Ndinkakonda kukhala nalo kupambana kukhala ndi kuŵala kwa dzuŵa, chifukwa kuŵala kwa lunthalo nkosalekeza.

¹¹Zabwino zonse zidandidzera pamodzi ndi luntha, m'luntha muli chuma chosaŵerengeka.

¹²Ndidakondwera nazo zabwino zonsezo, chifukwa zidabwera ndi luntha lomwelo. Koma sindinkadziŵa kuti manthu wa zabwino zonsezo anali luntha.

¹³Monga ndidaphunzira za luntha mosadzikonda, ndiziphunzitsanso mosamana. Sindibisa zabwino zake,

¹⁴chifukwa luntha ndi chuma chosatha kwa anthu. Okhala ndi lunthalo amapalana chibwenzi ndi Mulungu, ndipo Mulungu amaŵakonda chifukwa cha mphatso zobwera ndi luntha.

¹⁵Mulungu andithandize kufotokoza monga kuyenera, maganizo anga akhale oyenera mphatso zimene ndidazilandira. Ndiye amene amatsogolera luntha, ndiye amene amaongolera anthu anzeru.

¹⁶Ife pamodzi ndi mau athu tili m'manja mwake, monganso luntha lonse ndi luso logwirira ntchito.

¹⁷Ndiye amene adandipatsa nzeru zomvetsa bwino zinthu m'mene ziliri, ndiye amene adandidziŵitsa mapangidwe onse a dziko lapansi ndi makhalidwe a zinthu zokhalamo.

¹⁸Ndiye amene adandiphunzitsa chiyambi, mathero ndi mphindikati za nthaŵi, za mayendedwe a dzuŵa ndiponso za masinthidwe a nyengo za chaka.

¹⁹Ndiye amene adandidziŵitsa za zigawo za chaka ndi za magulu a nyenyezi.

²⁰Ndiye amene adandiphunzitsa za chilengedwe cha nyama ndi za ukali wa zilombo. Ndiye amene adandiwuza za mphamvu za mizimu ndi za maganizo a anthu, ndiye amene adandiwuza za mitundu ya mbeu ndi mphamvu za mizu yake.

²¹Zonse zobisika ndi zonse zodziŵikiratu ndidaphunzira, chifukwa luntha limene lidapanga zonse ndiye limene lidandiphunzitsa.

²²Pajatu m'luntha muli mzimu wanzeru ndi woyera, mzimu umodzi wokha ndi wogwira ntchito zambiri, wosagwirika, woyenda mwaufulu ndi woloŵerera m'zonse, wosaipa, wapawokha, wosasinthika, wokonda zabwino, watcheru, wosatheka kulimbana nawo.

²³Mzimu umenewu ndi wachifundo, wokonda anthu, wokhulupirika, wosapeneka, ndi wabata, wamphamvuzonse ndi woyang'anira zonse, woloŵa m'mitima yonse yanzeru, yoyera ndi yomvetsa zapatali.

²⁴Pajatu lunthali ndi loyenda kwambiri koposa liŵiro lina lililonse, chifukwa chakuti ndi langwiro ndithu, limaloŵa m'katikati mwa zinthu zonse.

²⁵Luntha ndi mpweya wa mphamvu za Mulungu, luntha nkunyezimira kwa ulemerero wa Wamphamvuzonse. Nchifukwa chake koipa kalikonse sikangaloŵe m'luntha.

²⁶Luntha nkuyera kosonyeza kuŵala kwamuyaya, ndi kalilole kopanda maanga koonetsa ntchito za Mulungu, ndi chitsanzo cha ubwino wake.

²⁷Luntha limakhoza zonse, ngakhale lili lokha. Limakometsanso zonse, ngakhale ndi losasinthika. Limaloŵa m'mitima yoyera ya anthu a mbadwo uliwonse, limaŵasandutsa abwenzi a Mulungu ndi aneneri.

²⁸Pajatu amene Mulungu amaŵakonda kwambiri ndi anthu okhala pamodzi ndi luntha.

²⁹Pajatu luntha ndi lokongola kupambana dzuŵa, limapambananso magulu a nyenyezi. Limaposa kuŵala kwa usana,

³⁰poti usiku umatsatana ndi usana, koma zoipa sizingapambane luntha.