Read Buku Loyera - Chichewa Lun. 8 Bible Online

Lun. 8 - Buku Loyera - Chichewa bible

Lun. 8

¹Luntha limafika ndi mphamvu mpaka ku malire a dziko, limalongosola zonse mwachifundo ndithu.

²Ndidakonda luntha ndi kulifunafuna kuyambira pa unyamata wanga, ndidasirira kuti ndilikwatire, ndinkatengedwa nako mtima kukongola kwake.

³Limasonyeza chiyambi chake chaulemu pophathana ndi Mulungu. Ndipo Ambuye, mwini zonse, amalikonda.

⁴Luntha limamvetsako zimene Mulungu akudziŵa, ndipo limagwira naye pamodzi ntchito zake.

⁵Ngati chuma nchofunika pa nthaŵi ya moyo uno, kodi pali china chakenso chamtengowapatali koposa luntha limene limachita zonse?

⁶Ngati kumvetsa zinthu nkothandiza, nchiyaninso chingathandize kopambana luntha limene limapanga zinthu zonse?

⁷Kwa anthu ofunitsa kuyenda molungama, ntchito za luntha zimadzetsa makhalidwe abwino. Limaphunzitsa za kudziletsa, za kuchenjera bwino, za kutsata chilungamo ndi za kulimba mtima; palibe chinthu china chothandiza anthu pa moyo uno kupambana makhalidwe ameneŵa.

⁸Ngati munthu alakalaka kukhala wokhoza zambiri, luntha limadziŵa zakale, limalingalira zakutsogolo. Limamvetsa mau apatali zedi, limamasula zophiphiritsa. Limadziŵiratu zizindikiro ndi zodabwitsa sizinafike, limadziŵiratu zimene zidzachitike pa nyengo zina.

⁹Nchifukwa chake ndidatsimikiza kuti luntha lidzakhale mnzanga wokhala naye pa moyo wanga, podziŵa kuti lidzakhala mlangizi wanga wabwino ndi msangalatsi wanga pa masautso ndi zovuta.

¹⁰Ndidati, pokhala ndi luntha ndidzatchuka pakati pa anthu, akuluakulu adzandilemekeza ngakhale ndikali mnyamata.

¹¹Anthu adzazindikira luso langa pa milandu, akuluakulu omwe pondiwona adzadabwa.

¹²Ndikadzakhala chete, adzadikira kuti ndilankhule. Ndikadzalankhula, adzatchera khutu. Ndikadzachulukitsa mau, adzangoti pakamwa gwirire.

¹³Chifukwa cha lunthalo, ndidzakhala wosadzafa, adzukulu anga ndidzaŵasiyira chikumbutso chamuyaya.

¹⁴Ndidzalamulira makamu a anthu, anthu a mitundu ina adzandigonjera.

¹⁵Mafumu aukali omwe adzachita mantha, akadzamva za ine. Ndidzakhala wachifundo pakati pa anthu, ndi wa mtima wolimba pa nkhondo.

¹⁶Ndikadzabwerera kunyumba kwanga, luntha lidzandithandiza pa mpumulo wanga, chifukwa okhala ndi luntha samva ululu kapena zoŵaŵa, amangokondwera ndi kusangalala.

¹⁷Zimene ndidaganiza ndi kulingalira mumtima mwanga ndi izi: kuti munthu ukakhala ndi luntha, umapeza moyo wamuyaya.

¹⁸Ukakhala bwenzi la luntha, umapeza chisangalatso chenicheni. Ntchito zake zimabweretsa chuma chosaŵerengeka. Tikagwirizana ndi luntha nthaŵi zonse, timamvetsa zinthu, ndipo timakhala otchuka popindulako ndi mau ake. Nchifukwa chake ndidayendayenda ponseponse, kufuna njira yolipezera.

¹⁹Ndili mwana, ndinali wa khalidwe labwino, ndi wa mtima wokoma,

²⁰ai, koma ndinene kuti poti ndinali wabwino, ndiye kuti ineyo ndidaadza m'thupi lopanda machimo.

²¹Komabe ndidazindikira kuti sindikadatha kuwona luntha pa ndekha, popanda Mulungu kundipatsa. Ichinso chinali chizindikiro choonetsa nzeru kudziŵa kumene luntha limafumira. Tsono ndidapempha Ambuye ndi mtima wanga wonse kuti,