Read Buku Loyera - Chichewa Lun. 9 Bible Online

Lun. 9 - Buku Loyera - Chichewa bible

Lun. 9

¹“Mulungu wa makolo anga, Ambuye achifundo ndinu amene mudalenga zinthu zonse ndi mau anu.

²Ndi nzeru zanu mudalenga munthu, kuti azilamulira zolengedwa zonse zimene Inu mudazipanga,

³kuti aweruze dziko lino lapansi ndi mtima wangwiro ndi wolungama, ndipo kuti azigamula milandu mosakondera.

⁴Mundipatse luntha limene limakhala pafupi ndi mpando wanu wachifumu, musandichotse m'gulu la ana anu.

⁵Ndinedi mtumiki wanu, mwana wa mdzakazi wanu. Ndine munthu wofooka ndi wa moyo wochepa. Ndimangomvetsa pang'ono za chilungamo ndi malamulo.

⁶Ngakhale munthu akhale wangwiro pakati pa ana a anthu, koma popanda luntha lochokera kwa Inu, anthu adzamuyesa wopanda pake.

⁷“Ndinu mudandisankhula kuti ndikhale mfumu ya anthu anu, ndi kumaweruza ana anu aamuna ndi aakazi.

⁸Mudandilamula kuti ndikumangireni Nyumba pa phiri lanu loyera, ndiponso guwa lansembe mu mzinda umene Inu mumakhalamo, potsata chitsanzo cha chihema choyera chimene mudachikonza poyamba paja.

⁹Luntha limakhala nanu, ndipo limadziŵa ntchito zanu. Linali nanu pamene munkalenga dziko lapansi. Limadziŵa zimene zili zabwino pamaso panu, ndi zimene zili zolungama potsatana ndi malamulo anu.

¹⁰Mulitumize kuchokera ku dziko loyera lakumwamba ndi ku mpando wanu waulemerero, kuti likhale nane ndi kundithandiza pa ntchito zanga, ndipo lindidziŵitse zokomera Inu.

¹¹Luntha limadziŵa ndi kumvetsa zonse. Lidzanditsogolera mochenjera pa ntchito zanga ndipo lidzanditchinjiriza ndi ulemerero wake.

¹²Tsono ntchito zanga zidzakhala zovomerezeka, ndidzaweruza anthu anu molungama, ndipo ndidzakhala woyenerera mpando waufumu wa atate anga.

¹³“Kodi ndani angathe kudziŵa maganizo a Mulungu? Ndani angathe kuzindikira zimene Ambuye akufuna?

¹⁴Nzeru za anthu nzopereŵera, zolinga zathu nzotha kulephera.

¹⁵Chifukwa thupi lodzafali limalemetsa mtima, nyumba yake yadothiyi imavuta mtima woganiza zambiri.

¹⁶Nkwapatali kale kwa ife kulota zimene zili pansi pano, ndipo timachita kuvutikira kuti timvetse ngakhale zimene zili pafupi nafe. Nanji tsono zimene zili kumwamba, angazitulukire ndani?

¹⁷Ndani angathe kudziŵa kufuna kwanu Ambuye, mutapanda kumupatsa luntha, kapena kumutumizira mzimu wanu woyera kuchokera kumwamba?

¹⁸Motero njira za anthu a pansi pano zidalungamitsidwa, anthu adaphunzira zimene zimakukomerani, ndipo adapulumuka chifukwa cha luntha.”