Read Buku Loyera - Chichewa Mphu. 1 Bible Online

Mphu. 1 - Buku Loyera - Chichewa bible

Mphu. 1

¹MAU OYAMBIRIRA Maphunzitso akuluakulu ambiri adatifikira mwa njira ya Malamulo ndi Aneneri ndi enanso obwera pambuyo pao. Tsono nkoyenera kuŵatamanda Aisraele chifukwa cha maphunzitso aowo ndi nzeru zaozo. Koma nkosakwanira kuti oŵerenga maphunzitsowo angopezamo nzeru za iwo okha. Nkofunikanso ndithu kuti anthu amene ali ndi chidwi pophunzira, azithandiza anzao ena poŵaphunzitsa ndi mau apakamwa ndiponso zolemba zao. Agogo anga aYesu ankachita khama kuŵerenga Malamulo ndi Aneneri ndi mabuku ena amene makolo athu adatisiyira, ndipo adaphunziradi zambiri. Tsono nawonso adafuna kulemba zina za malangizo ndi za nzeru, kuti anthu okonda kuphunzira akaŵerenga zimenezi, azisunthira m'tsogolo potsatadi Malamulo pa moyo wao. Ndiye ndikukupemphani kuti muziŵerenga bukuli ndi mtima wofuna kuphunzira ndiponso mosamala kwambiri. Ngati paoneka kuti tidalephera pena ndi pena kunena bwino zimene mauwo amatanthauza, apo mutikhululukire. Mau ena achihebri nkovuta kuŵapezera tanthauzo lake lenileni m'(...)

²Ndani angaŵerenge mchenga wakunyanja? Ndani angaŵerenge madontho a mvula? Ndipo ndani angaŵerenge masiku a muyaya?

³Ndani angathe kuyesa kutalika kwa mlengalenga? Ndani angayese kukula kwa dziko lapansi? Ndani angayese kuzama kwa phompho? Nanji tsono ndani angayese kuzama kwa nzeru?

⁴Nzeru ndizo zinali zoyamba kulengedwa, zinthu zina zilizonse zisanalengedwe. Kumvetsa zinthu mwanzeru kudaalipo chiyambire.

⁵Kasupe wa nzeru ndi mau a Mulungu amene ali kumwamba. Makhalidwe ake ndi malamulo amuyaya.

⁶Maziko a nzeru ndani adamuululirapo? Nanga kuchenjera kwake ndani amakudziŵa?

⁷Ndani amadziŵa zonse zimene nzeru zimadziŵa? Ndani amamvetsa zonse zimene nzeru zimamvetsa?

⁸Alipo Mmodzi yekha wanzeru, woyenera kumamuwopa kwambiri, wokhala pa mpando wake waufumu. Ameneyo ndi Ambuye.

⁹Ndiwo amene adalenga nzeru, adaziyang'ana ndi kuziyesa ndipo adaziika m'ntchito zake zonse.

¹⁰Nzeruzo zimakhala mwa anthu ngati mphatso ya Mulungu, ndipo Iyeyo amazipatsa amene amamkonda. Za Kuwopa Mulungu

¹¹Kuwopa Ambuye kumapatsa ulemerero ndi chikondwerero, kumapatsa chimwemwe ndi nsangamutu ya chisangalalo.

¹²Kuwopa Ambuye kumakondweretsa mtima, kumapatsa chisangalalo, chimwemwe ndi moyo wautali.

¹³Amene amaopa Ambuye, zonse zidzamuyendera bwino mpaka ku mathero. Mulungu adzamdalitsa pa tsiku la kufa kwake.

¹⁴Kuwopa Ambuye ndiye chiyambi cha nzeru. Anthu okhulupirika amazilandira akali m'mimba mwa amai ao.

¹⁵Zimakhazikika pakati pa anthu mpaka muyaya, ndipo zidzukulu za anthuwo zidzadalira nzeru zimenezo.

¹⁶Kuwopa Ambuye ndiye nzeru zenizeni, anthu amakhuta ndi zipatso zake.

¹⁷Nzeru zimadzaza nyumba za anthu ndi zimene iwo akufuna, nkhokwe zao zimadzaza ndi zokolola zake.

¹⁸Kuwopa Ambuye ndiye nzeru zonse zathunthu, kumapatsa mtendere ndi moyo wamphamvu.

¹⁹Nzeru zimathandiza kudziŵa ndi kumvetsa zinthu. Onse amene ali nazo nzeruzo, zimaŵakulitsira ulemerero wao.

²⁰Kuwopa Ambuye ndiye maziko a nzeru, nthambi zake ndi moyo wautali.

²¹Kuwopa Ambuye kumachotsa machimo; pamene nzeru zakhazikika, mkwiyo umathaŵapo.

²²Kukwiya popanda chifukwa sikungakhale chinthu cholungama. Mkwiyo umaononga mwiniwake yemwe.

²³Munthu wopirira amadzigwira mpaka nthaŵi yake yoyenera itafika, pambuyo pake amadzakondwera kwabasi.

²⁴Mau ake amaŵasunga mu mtima, mpaka nthaŵi yake itafika. Pambuyo pake anthu amadzakamba zoti munthuyo ngwanzeru.

²⁵Nzeru zili ndi malangizo okhwima m'nkhokwe mwake, koma kukonda zachipembedzo munthu woipa kumamunyansa.

²⁶Ukafuna nzeru, tsata malamulo, apo Ambuye adzakupatsadi nzeruzo.

²⁷Kuwopa Ambuye ndiye nzeru ndi kusunga mwambo. Kukhulupirika ndi kufatsa ndiye zimene zimakondweretsa Ambuyewo.

²⁸Usanyozere za kuwopa Ambuye, usaŵayandikire Ambuyewo ndi mtima wonyenga.

²⁹Usakhale wachiphamaso pakati pa anthu, ndipo uzisamala bwino mau ako.

³⁰Usadzitame kuwopa kuti ungagwe nuchita manyazi, Ambuye nkuulula zinsinsi zako ndi kukuchititsa manyazi pamaso pa anthu, chifukwa mayendedwe ako sanali oopa Ambuyewo. Mtima wako unali wonyenga kwambiri.