Read Buku Loyera - Chichewa Mphu. 10 Bible Online

Mphu. 10 - Buku Loyera - Chichewa bible

Mphu. 10

¹Mtsogoleri wanzeru amaphunzitsa anthu ake mwambo, ulamuliro wa munthu wanzeru umakhala wadongosolo.

²Monga m'mene aliri mtsogoleri, nduna zakenso zimakhala chimodzimodzi. Monga m'mene aliri mkulu wa mzinda, anthu akenso amakhala chimodzimodzi.

³Mfumu yopanda mwambo imaononga anthu ake, mzinda kuti ukhale pabwino, nchifukwa cha atsogoleri anzeru.

⁴Dziko lapansi ulamuliro wake uli m'manja mwa Mulungu. Amalipatsa mtsogoleri woyenera pa nthaŵi yake.

⁵Kukhoza kwa munthu kuli m'manja mwa Ambuye. Iye ndiye amene amapereka ulemerero kwa munthu wolamulira. Atsutsa kunyada

⁶Usapsere mtima mnzako chifukwa cha cholakwa chilichonse, ndipo usachite kanthu mwachipongwe.

⁷Kunyada kumaipira Mulungu ndi anthu omwe, ndipo kusalungama kumaipira onsewo.

⁸Kusalungama, chipongwe ndi chuma zimathetsa ulamuliro wa mtundu wa anthu, ndiye mtundu wina umadzalamulira m'malo mwake.

⁹Munthu ndi fumbi chabe ndi phulusa, anganyade bwanji? Suja m'thupi mwake mumatha kuwola iye akali moyo!

¹⁰Matenda achimgonera amathetsa nzeru asing'anga. Munthu amati lero ndi mfumu, maŵa lino ndi mtembo.

¹¹Tonse tikafa, zathu nzimodzimodzi: tizilombo, nyama zokwaŵa ndi nyongolotsi.

¹²Kuti munthu wayamba kunyada, mumamuwonera kusiya Ambuye, ndiye kuti kufulatira Mlengi wake.

¹³Paja chiyambi cha kunyada ndi tchimo, ndiye kuti woumirira kunyada kwake amachulukitsa zonyansa. Nchifukwa chake anthu otero Ambuye adaŵatumizira zilango zodabwitsa, ndipo adaŵaononga kotheratu.

¹⁴Ambuye adachotsa mafumu amphamvu pa mipando, m'malo mwao adaikamo anthu otsika.

¹⁵Ambuye adazula mitundu ya anthu odzitama, ndipo m'malo mwao adaikamo anthu odzichepetsa.

¹⁶Ambuye adasakaza maiko a anthu a mitundu ina, adaŵaononga mpaka pamaziko penipeni pa dziko.

¹⁷Ena adaŵachotseratu ndi kuŵaonongadi mpaka kuti asakumbukikenso pa dziko lapansi.

¹⁸Mlengi sadalenge munthu kuti azinyada, kapena wobadwa mwa mkazi kuti akhale ndi ukali woopsa. Za anthu oyenera kulandira ulemu

¹⁹Ndi mtundu wa zolengedwa ziti umene uyenera kulandira ulemu? Mtundu wa anthu. Ndi anthu a mtundu wanji amene ayenera kulandira ulemu? Anthu oopa Ambuye. Ndi mtundu wa zolengedwa ziti umene suyenera kulandira ulemu? Mtundu wa anthu. Ndi anthu a mtundu wanji amene ulemu suŵayenera? Anthu ophwanya malamulo.

²⁰Anthu apachibale mtsogoleri wao ndiye amalandira ulemu, ndipo anthu oopa Ambuye amalandira ulemu kwa Ambuyewo.

²¹Uziwopa Ambuye, ndipo adzakulandira. Khala wokanika ndi wonyada, ndipo adzakukana.

²²Olemera, otchuka ndi osauka, onsewo ulemerero wao uli pa kuwopa Ambuye.

²³Si chilungamo konse kunyoza wosauka amene ali ndi nzeru. Nkulakwa kulemekeza munthu wochimwa.

²⁴Mkulu, muweruzi ndi wolamulira, onsewo ngoyenera kuŵalemekeza. Koma mwa onsewo palibe woti nkupambana munthu woopa Ambuye.

²⁵Kapolo wanzeru mfulu zomwe zidzamtumikira. Munthu wanzeru sadzaŵiringula nazo. Za kulankhula zoona ndi kudzichepetsa

²⁶Pogwira ntchito zako usayerekedwe, pamene uli m'zovuta usadzitame.

²⁷Nkwabwino kugwira ntchito ndi kukhala ndi zinthu zambiri, koposa kunyada ndi kukhala ndi njala.

²⁸Mwana wanga, udzilemekeze, koma modzichepetsa, udzipatse ulemu koma moyenera.

²⁹Ndani angamuyese wolungama munthu wodzichimwira yekha, kapena kumlemekeza munthu wosadzilemekeza yekha?

³⁰Munthu wosauka amamlemekeza chifukwa cha nzeru zake, pamene munthu wolemera amamlemekeza chifukwa cha chuma chake.

³¹Ngati munthu amlemekeza ali mmphaŵi nanji akadakhala wolemera! Ngati munthu amnyoza ali wolemera, nanji akadakhala wosauka!