Read Buku Loyera - Chichewa Mphu. 11 Bible Online

Mphu. 11 - Buku Loyera - Chichewa bible

Mphu. 11

¹Maonekedwe amanyenga Munthu wosauka akakhala wanzeru, amayenda mogundika, ndipo amaŵerengedwa pakati pa akuluakulu.

²Usatamande munthu chifukwa cha kukongola kwake, ndipo usadane ndi munthu chifukwa cha maonekedwe chabe.

³Njuchi njaing'ono pakati pa zouluka, komabe uchi wake ngwotsekemera kupambana zotsekemera zonse.

⁴Usanyade chifukwa cha zovala zako zokongola, kapena kudzitukumula ukalandira ulemu. Paja ntchito za Ambuye nzodabwitsa, komabe nzobisika kwa anthu.

⁵Mafumu ambiri adaŵatsitsa, woloŵa ufumu nkukhala munthu wosayembekezeka.

⁶Olamulira ambiri adaŵalanda ulemerero wao, anthu otchuka adaŵapereka m'manja mwa ena.

⁷Usayambe nkudzudzula usanafufuze nkhani. Uyambe waganizira bwino, kenaka ndiye kudzudzula.

⁸Usanayankhe, yamba wamvetsera bwino, mnzako akamalankhula, usamdule pakamwa.

⁹Usatengeke ndi zinthu zosakukhudza, anthu ochimwa akamakangana, iwe usaloŵerepo.

¹⁰Mwana wanga, usatanganidwe ndi zambiri. Ukachulutsa zochitachita, udzagwa m'mavuto. Ngakhale ufulumire chotani, sudzazitha, ngakhale uzithaŵe, sudzapulumuka.

¹¹Ena amagwira ntchito mwamphamvu ndi mofulumira, komabe amatsalira kumbuyo. Za kukhulupirira Mulungu yekha

¹²Wina amakhala wopanda nzeru, wosoŵa chithandizo, wopanda mphamvu ndiponso mmphaŵi zedi, komabe Ambuye amamuyang'ana ndi diso lachifundo, ndipo amamchotsera mavuto ake.

¹³Amamkweza kwambiri, mpaka anthu onse kumadabwa.

¹⁴Zabwino ndi zoipa, moyo ndi imfa, umphaŵi ndi chuma, zonsezi zimachokera kwa Ambuye.

¹⁵Luntha, kumvetsa zinthu, ndi kudziŵa Malamulo, zonsezi zimachokera kwa Ambuye. Chikondi ndi kuchita ntchito zabwino zimenezinso zimachokera kwa Ambuye.

¹⁶Kupusa ndi mdima adazilengera anthu ochimwa. Anthu okondwerera zoipa, adzakalambira m'zoipazo.

¹⁷Mphatso zimene Mulungu amapatsa anthu omukonda nzokhalitsa. Mulungu akakondwera nawe, uzidzakhoza nthaŵi zonse.

¹⁸Munthu wina adalemera chifukwa cha kuchenjera ndi kudzimana, tsono malipiro ake ndi aŵa:

¹⁹Angathe kunena kuti, “Tsopano nditambalala, ndikondwerere zimene ndidapata.” Komabe sangadziŵe kuti chumacho adzakhala nacho nthaŵi yaitali bwanji. Adzachisiyira ndithu ena, iyeyo nkufa.

²⁰Uzilimbikira kuchita bwino ntchito yako nkumaikapo mtima. Ukalambire pa ntchito yakoyo.

²¹Usasirire kukhoza kwa anthu ochimwa. Iwe khulupirira Ambuye ndi kusamala zako. Kwa Ambuye nchinthu chapafupi, angathe kulemeretsa mmphaŵi pa kamphindi ndiponso mwadzidzidzi.

²²Madalitso a Ambuye ndiye mphotho ya munthu wokonda Mulungu. Pa nthaŵi yosakula Mulungu amaŵapindulitsa madalitsowo.

²³Usanene kuti, “Kodi ine ndikusoŵa chiyani? Nanga m'tsogolo muno ndidzakhala pabwino chotani?”

²⁴Usanene kuti, “Ine ndine chikwanekwane, ndi tsoka lanjinso lingandigwere?”

²⁵Munthu zikamamuyendera bwino zonse, mavuto onse amaiŵalika. Koma pa nthaŵi ya mavuto, sakumbukiranso kuti zinthu zinkamuyendera bwino.

²⁶Pa nthaŵi imene munthu alikufa, nkwapafupi kwa Ambuye kumlipira potsata zimene adachita.

²⁷Kanthaŵi kakang'ono ka mavuto kamaiŵalitsa zokoma zonse. Pamene munthu akutsirizika, ndi pamene makhalidwe ake amadziŵika.

²⁸Munthu asanafe, osamutchula wodala, munthu amadziŵika ndi mathero ake. Osaŵakhulupirira anthu ochimwa

²⁹Usamangoloŵetsa munthu aliyense m'nyumba mwako, chifukwa anthu onyenga ali ndi misampha yambiri.

³⁰Mtima wa munthu wonyada uli ngati nkhwali yam'chitatanga, munthuyo ali ngati mzondi amene akungoyembekeza kugwa kwako.

³¹Amafunafuna mpata woti apotoze zabwino kuti zikhale zoipa, ndipo amadzudzula anthu ochita zabwino.

³²Kambaliŵali ka moto kamayatsa makala ambiri, chonchonso munthu woipa amalalira anthu kuti aŵaphe.

³³Uchenjere naye munthu woipa chifukwa ali ndi zolinga zoipa. Ukapanda kutero adzakuwonongera mbiri yako mpaka muyaya.

³⁴Ukaloŵetsa munthu wachilendo m'nyumba mwako, adzakudzetsera mavuto, adzakuputira mikangano pakati pa iwe ndi a m'banja mwako.