Read Buku Loyera - Chichewa Mphu. 12 Bible Online

Mphu. 12 - Buku Loyera - Chichewa bible

Mphu. 12

¹Malangizo okhudza ntchito zabwino Ukafuna kuchitira wina zabwino, usankhule munthu woyenerera, ukatero zabwino zakozo sizidzapita pachabe.

²Ukachitira zabwino munthu wokonda Mulungu, udzalandira mphotho. Ngati sadzakupatsa ndi munthuyo, mosapeneka konse adzakupatsa ndi Mulungu Wopambanazonse.

³Sangapeze zabwino munthu woumirira zoipa, kapena munthu wosathandiza osauka.

⁴Uzithandiza munthu woopa Mulungu, koma osati munthu wochimwa.

⁵Uzichitira zabwino munthu wodzichepetsa, koma osampatsa kanthu munthu wosalabadira za Mulungu. Ummane chakudya, usampatse konse, kuwopa kuti angadzasanduke wamphamvu koposa iwe. Adzakubwezera zoipa moŵirikiza pamalo pa zabwino zonse zimene udamchitira.

⁶Mulungu Wopambanazonse amadana ndi ochimwa, adzalanga anthu onse okonda zoipa.

⁷Munthu wabwino umpatseko kanthu, koma wochimwa osamthandiza. Za abwenzi oona ndi onyenga

⁸Ukakhala pabwino, abwenzi ako enieni sadziŵika, koma ukakhala pa mavuto adani ako sachedwa kudziŵika.

⁹Zonse zikamakuyendera bwino, adani ako amamva chisoni, koma pa nthaŵi ya mavuto, ngakhale abwenzi ako atha kukusiya.

¹⁰Mdani wako usamkhulupirire konse, ali ndi chiwembu ngati dzimbiri pa chitsulo.

¹¹Akamaoneka modzichepetsa, namachita gwadugwadu, iwe ungoti phee, nkukhala maso. Uchite ngati ukupukuta kalilole, udzaona kuti kuthimbirira kwake nkosakhalitsa.

¹²Usakhale naye pafupi, kuwopa kuti angakukankhe nkutenga malo ako. Usamkhazike ku dzanja lako lamanja, kuwopa kuti angakulande mpando wako. Tsono potsiriza pake udzadziŵa kuti mau anga anali oona, ndipo udzanong'oneza bondo poŵakumbukira.

¹³Kodi woseŵera ndi njoka amamumvera chisoni ndani ikamuluma? Woputa dala chilombo cholusa amamumvera chisoni ndani chikamuluma?

¹⁴Palibe amene amamchitira chisoni munthu woyenda ndi anthu oipa kapena wothandizana nawo pa zoipa.

¹⁵Iye uja angathe kukhala nawe kanthaŵi pang'ono, koma ukagwa m'zovuta, sadzakhala nawenso.

¹⁶Pakamwa pa mdani pamalankhula zabwino, pamene mumtima mwake akuganiza zokuponya m'mbuna. M'maso mwake misozi ili mbwembwembwe, koma akapeza mpata, kupha sayesa kanthu.

¹⁷Tsoka likakugwera, udzamupeza akukutsogolera, amaoneka ngati akufuna kukuthandiza, koma adzakutchera ndale kuti ugwe.

¹⁸Pamenepo adzasanduka wina, adzapukusa mutu, adzachita kuti m'manja lya! Nkuyamba kuchita miseche.