Read Buku Loyera - Chichewa Mphu. 13 Bible Online

Mphu. 13 - Buku Loyera - Chichewa bible

Mphu. 13

¹Za kukhala pamodzi ndi anthu ofanafana nawo Ukakhudza phula, limakukangamira. Ukamayanjana ndi anthu onyada, nawenso udzakhala wonyada.

²Usanyamule katundu wobzola mphamvu zako. Usamayanjane ndi munthu woposa iwe pa mphamvu ndi chuma. Mbiya yadothi ndi chiŵiya chachitsulo zingayenderane bwanji? Zitati ziwombane, mbiyayo nkuphwanyika.

³Munthu wolemera akalakwa, amakangaza kudzudzula anthu ena. Munthu wosauka anzake akamlakwira, amayenera kupepesa ndi iyeyo.

⁴Munthu wolemera amafuna chithandizo chako, akaona kuti iyeyo apezapo phindu. Koma iweyo ukasoŵa ch ithandizo, amakulekerera.

⁵Ngati uli pabwino, amakhala nawe, ndipo adzakudyera zako zonse mtima uli zii.

⁶Akamakusoŵa iweyo, amakubwatika, amakusekerera nkukulimbitsa mtima. Amakulankhula mwaulemu nkukuuza kuti, “Kodi ndingakuthandizeni?”

⁷Adzakuchititsa manyazi ndi maphwando ake, mpaka atakokolola zako zonse moŵirikiza, potsiriza nkumakuseka. Pambuyo pake atakuwona adzakuthaŵa, nkumangopukusa mutu mokunyodola.

⁸Uchenjere kuti angakubwatike, pambuyo pake iwe nkunyozeka ndi kupusa kwako.

⁹Munthu wotchuka akakuitana kunyumba kwake, usavomere msanga, pamenepo adzabwerezabwereza kukuitanako.

¹⁰Usafulumire kunka patsogolo, kuwopa kuti angakubweze pambuyo. Komanso usanyanye kukhala pakati, mwina nkudzakuiŵala.

¹¹Usamamuyese ngati mnzako wolingana naye, usakhulupirire kuchuluka kwa mau ake. Kuchulukitsa mauko nkukuyesa chabe, kukusekererako nkukupima chabe.

¹²Munthu wosasunga chinsinsi ngwankhanza, sadzaopa kukupweteketsa ndi kukumangitsa.

¹³Tsono zachinsinsi zako uzisunge mu mtima ndipo ukhale tcheru, chifukwa chiwonongeko chako umayenda nacho limodzi.

¹⁴Ukamva zimenezi uli m'tulo, dzuka. Uzikonda Ambuye pa moyo wako wonse, uŵapemphe kuti akupulumutse.

¹⁵Cholengedwa chamoyo chilichonse chimakonda mtundu wake, munthunso amakonda anzake.

¹⁶Zolengedwa zonse zimayenderana pa mtundu wake, munthunso amagwirizana ndi anthu onga ngati iyeyo.

¹⁷Monga mmbulu ndi mwanawankhosa sizingayanjane, chimodzimodzinso munthu wochimwa ndi munthu wolungama.

¹⁸Monga pakati pa fisi ndi galu sipangakhale mtendere, chimodzimodzinso pakati pa munthu wolemera ndi munthu wosauka.

¹⁹Monga momwe mikango imadyera mbidzi ku chipululu, momwemonso munthu wolemera amadyera masuku pa mutu munthu wosauka.

²⁰Munthu wonyada amadana ndi kudzichepetsa, ndipo wolemera amanyansidwa ndi kusauka.

²¹Munthu wolemera akamadzandira, abwenzi ake amamgwirira. Koma munthu wosauka akagwa, ndi abwenzi ake omwe amamkankhira kumbali.

²²Munthu wolemera akaterereka, anthu ambiri amamthandiza. Ngakhale alankhule zopusa, anthu amamuyamikabe. Munthu wosauka akaterereka, anthu amamdzudzula. Ngakhale alankhule zanzeru, anthu sasamalako.

²³Munthu wolemera akamalankhula, anthu onse amakhala chete, amanka natamanda mau ake konsekonse. Munthu wosauka akamalankhula, anthu amati, “Kodi ndaninso ameneyu?” Ndipo akangophunthwa, anthunso amamkankhira pansi.

²⁴Kulemera nkwabwino ngati munthu sikumchimwitsa. Anthu osadziŵa Mulungu amati kusauka ndi chinthu choipa.

²⁵Nkhope ya munthu imasinthika malinga ndi mtima wake, mwina imaoneka bwino mwina ai.

²⁶Nkhope yosangalala ndiye chizindikiro cha mtima wokondwa. Koma kupeka miyambi ndi ntchito yotopetsa.