Read Buku Loyera - Chichewa Mphu. 14 Bible Online

Mphu. 14 - Buku Loyera - Chichewa bible

Mphu. 14

¹Za chimwemwe choona Ngwodala munthu amene sanachimweko polankhula, ndipo sayenera kuvutika mu mtima chifukwa cha machimo.

²Ngwodala munthu amene mtima wake sumutsutsa, munthu amene sadataye chikhulupiriro chake. Za njiru ndi umbombo

³Chuma sichimkhala bwino munthu wakaliwumira. Kodi munthu wanjiru chuma ali nacho ntchito yanji?

⁴Munthu wodziwunjikira chuma podzimana, amangosungira anzake, ndi ena amene adzasangalale nacho chuma chakecho.

⁵Kodi munthu wodziwumira mtima, angathandize anzake bwanji? Iye yemwe sadzakondwera nacho chuma chakecho.

⁶Palibe munthu wouma mtima kwambiri kupambana munthu wodziwumira mtima mwiniwake yemwe. Pamenepa ndiye pali chilango cha kuuma mtima kwake.

⁷Akachita zabwino, ndiye kuti zachitika mwangozi, potsiriza kuipa kwake kumadzaonekerabe poyera.

⁸Ngwoipitsitsa munthu wa diso lanjiru, amafulatira anzake, osasamalako za moyo wao.

⁹Maso a munthu woumira sakhutira nazo zinthu zake. Mtima wake umachita kukhwinyata nawo umbombo.

¹⁰Munthu wakaliwumira amachita umbombo ndi chakudya chomwe, m'nyumba mwake njala siichoka. Chuma chigwire ntchito zabwino

¹¹Mwana wanga, ukometse moyo wako monga m'mene ungathere, nthaŵi zonse uzipereka nsembe zoyenera kwa Ambuye.

¹²Kumbukira kuti imfa idzakufikira ndithu tsiku lina, koma nthaŵi yeniyeni yopita ku manda sungaidziŵe.

¹³Usanafe, uzichitira anzako zabwino, uziŵathandiza monga momwe ungathere.

¹⁴Usadzimane zisangalatso zalero, ndipo zabwino zimene ukuzikhumbira moyenera zisakupite.

¹⁵Nanga sudzasiyira ena chuma chako chimene udachivutikira? Ndipo zako zonse zimene udakhetsera thukuta adzaombezera kuti agaŵane bwino.

¹⁶Tsono khala munthu wopatsa, kwinaku uzilandira anzako akakupatsa kanthu. Dyeratu, kumanda kulibe zabwino.

¹⁷Amoyo onse amajujuka ngati nsalu, paja pali lamulo lachikhalire lakuti, “Munthu aliyense adzafa basi!”

¹⁸Monga amachitira masamba mu mtengo wogudira, ena akuyoyoka, ena akuphukira, ndi m'menenso imachitira mibadwo ya anthu: wina ukufa, wina ukubadwa.

¹⁹Ntchito zonse za munthu zimaola, mwini wake akapita, nazonso zii. Za chimwemwe cha munthu wanzeru

²⁰Ngwodala munthu amene amasinkhasinkha za luntha, ndipo amagwiritsadi ntchito nzeru.

²¹Ngwodala munthu amene amalingalira njira zake za luntha, adzasinkhasinkhanso zinsinsi zake.

²²Amalithamangira ngati mlenje wosaka nyama, amalalira lunthalo m'njira yake.

²³Amalisuzumira pa mawindo ake, ndipo amamvetsera pakhomo pake.

²⁴Ngwodala amene amakhala pafupi ndi nyumba ya luntha, ndipo amakhoma hema lake pafupi ndi chipupa cha nyumbayo.

²⁵Amamanga hema lake pafupi pa lunthalo, pamene mpokoma kukhalapo.

²⁶Amaika ana ake mumthunzi mwake, ndi kumanga msasa m'munsi mwa nthambi zake.

²⁷Luntha limamteteza ku mafundi, ndipo iye amakhazikika mu ulemerero wa lunthalo.