Read Buku Loyera - Chichewa Mphu. 15 Bible Online

Mphu. 15 - Buku Loyera - Chichewa bible

Mphu. 15

¹Munthu woopa Ambuye adzachita zimenezi. Akasunga bwino Malamulo, adzapeza luntha.

²Lidzamchingamira ngati mai wake. Lidzamulandira ngati mkazi wa pa unyamata wake.

³Chakudya chimene lidzampatsa chidzakhala kumvetsa zinthu, chakumwa chake chidzakhala nzeru.

⁴Adzaliyedzamira lunthalo ndipo sadzagwa. Adzadalira lunthalo ndipo sadzachita manyazi.

⁵Lidzamkweza kupambana anzake, ndipo lidzampatsa mau oti alankhule pa msonkhano.

⁶Choncho adzapeza chimwemwe chachikulu ndipo adzasangalala. Dzina lake lidzatchuka mpaka muyaya.

⁷Zitsiru sizidzakhala nalo lunthalo, anthu ochimwa sadzaliwona.

⁸Limakhala kutali ndi anthu onyada, anthu abodza saliganizira konse.

⁹Nyimbo yoyamika sikhala bwino m'kamwa mwa munthu wochimwa, poti sichokera kwa Ambuye.

¹⁰Mayamiko ayenera kuŵatchula mwaluntha, ndipo ndi Ambuye amene amaŵaika m'kamwa mwa munthu. Munthu ali ndi ufulu

¹¹Ukalakwa usamati, “Andilakwitsa ndi Ambuye,” poti iwo sangachititse munthu zomwe iwo omwe akudana nazo.

¹²Usamanena kuti, “Andisokeretsa ndi Ambuye,” chifukwa Iwo alibe nawo ntchito anthu ochimwa.

¹³Ambuye amadana ndi tchimo lililonse, nawonso anthu oŵaopa, sangakonde tchimo.

¹⁴Ambuye ndiwo amene adalenga anthu pa chiyambi, naŵapatsa ufulu wosankha okha chochita.

¹⁵Ngati ufuna, ungathe kutsata Malamulo. Kukhala wokhulupirika kapena ai zili kwa iwe.

¹⁶Adakuikira moto ndi madzi pamaso pako, tambalitsa dzanja lako, usankhepo chimene ufuna.

¹⁷Munthu amamuwonetsa moyo ndi imfa, ndipo amalandira chimene wasankhapo.

¹⁸Nzeru za Ambuye nzambiri kwabasi, ali ndi mphamvu zonse, ndipo amaona zonse.

¹⁹Ambuye amayang'anira onse oŵaopa, ndipo zonse zimene anthu amachita Iwo amazidziŵa.

²⁰Chikhalire sadalamule munthu aliyense kuti akhale wosasamala za Mulungu, kapena kumlola kuti azichimwa.