Read Buku Loyera - Chichewa Mphu. 16 Bible Online

Mphu. 16 - Buku Loyera - Chichewa bible

Mphu. 16

¹Za kutemberera anthu oipa Usakhumbe kukhala ndi ana ambiri achabechabe, kapena kukondwera nawo ana osaopa Mulungu.

²Angachuluke bwanji, usakondwere nawo, koma pokhapokha ngati amaopa Ambuye.

³Usakhulupirire kutalika kwa moyo wao, usadalire kuchuluka kwao. Ndi bwino kukhala ndi mwana mmodzi yekha koma woopa Mulungu, kupambana kukhala nawo 1,000 oipa. Ndi bwino kufa opanda ana kupambana kukhala ndi ana osasamala za Mulungu.

⁴Chifukwa cha munthu mmodzi yekha woopa Mulungu mzinda ukhoza kudzaza ndi anthu. Koma chifukwa cha chigulu cha anthu osatsata Malamulo, mzinda ukhoza kuwonongeka.

⁵Nthaŵi zambiri ndaona zinthu zoterezi ndipo ndamva zina zambiri zodabwitsa kupambana zimenezi.

⁶M'gulu la anthu ochimwa moto udzabuka, ndipo mkwiyo udzayakira anthu a mtundu waupandu.

⁷Mulungu sadakhululukire ziphona zakale zimene zinkanyadira mphamvu zao ndi kuchita zaupandu.

⁸Sadaleke kuŵalanga anthu oyandikana ndi Loti aja, chipongwe chao chidamnyansa Mulungu.

⁹Sadaŵachitire chifundo anthu oyenera kutayikawo, anthu amene ankanyadira machimo ao.

¹⁰Adaŵateronso anthu oyenda pansi 600,000 aja amene adasonkhana mwaupandu atakhuta mwano.

¹¹Ngakhale atakhala wokanika mmodzi yekha, zingakhale zodabwitsa atapanda kulangidwa. Paja Ambuye ali ndi chifundo, komanso ukali ngwao. Amaonetsa mphamvu pokhululuka, komanso amaonetsa mkwiyo.

¹²Chifundo chao nchachikulu, komanso amalanga koopsa. Amaweruza munthu potsata ntchito zake.

¹³Salola kuti wochimwa athaŵe ndi phindu lake loipa. Kupirira kwa munthu woopa Mulungu sikudzapita pachabe.

¹⁴Ambuye amalipira ntchito iliyonse yachifundo, ndipo munthu aliyense amamchitira potsata ntchito zake.

¹⁵Mulungu adaumitsa mtima Farao kuti asamzindikire, kuti ntchito za Mulungu zidziŵike pa dziko lapansi.

¹⁶Amachitira chifundo zolengedwa zake zonse, ndiye amene adagaŵa kuŵala ndi mdima pakati pa anthu. Chilango sichilephera kufika

¹⁷Usanene kuti, “Ndiŵabisalira Ambuye. Nanga ndani kumwambako angathe kundikumbukira? Pakati pa anthu ambiri chotere sangathe kundizindikira. Kodi ine ndine chiyani pakati pa zolengedwa zonse?

¹⁸Onani mlengalenga, thambo la kumwamba, phompho ndi dziko lapansi, zonsezi zimagwedezeka akamabwera Ambuye.

¹⁹Mapiri ndi maziko a dziko lapansi nawonso amanjenjemera, Ambuye akaŵayang'ana.

²⁰Koma ndani amaganizako za zimenezi, ndipo ndani amayesa kumvetsa njira za Ambuye?

²¹Monga namondwe amafikira anthu modzidzimutsa, momwemonso ntchito zambiri za Ambuye zimachitika mobisika.

²²Ndani angasimbe za ntchito zolungama za Ambuye? Ndani angaziyembekezere? Ndipotu chipangano chake chili kutali.”

²³Ameneŵa ndiwo maganizo a munthu wopanda nzeru, malingaliro opusa a munthu wosokonezeka. Za munthu pakati pa zolengedwa

²⁴Mwana wanga, undimvere ndipo uphunzire nzeru. Mvetsetsa bwino zimene ndikunena!

²⁵Ndidzakuphunzitsa mwambo mosamala, ndi kukuuza nzeru mosaphonya.

²⁶Ambuye adalenga zinthu poyambayamba, ndipo atazilenga, adazipatsa malire ake.

²⁷Adazilongosola dwakedwake mpaka muyaya, kuyambira pa chiyambi mpaka nthaŵi yakutsogolo. Zonsezo sizimva njala kapena kutopa, ndipo sizisiya ntchito zimene adazipatsa.

²⁸Palibe chimene chimaombana ndi chinzake, ndipo sizidzaleka kumvera lamulo la Ambuye.

²⁹Tsono Ambuye adayang'ana dziko lapansi, ndipo adalidzaza ndi zinthu zao zabwino.

³⁰Adadzaza nthaka yonse ndi zolengedwa zamoyo wa mitundu yonse, ndipo zonsezo zidzabwerera ku nthaka komweko.