Read Buku Loyera - Chichewa Mphu. 17 Bible Online

Mphu. 17 - Buku Loyera - Chichewa bible

Mphu. 17

¹Mulungu adapanga anthu ndi dothi, ndipo amaŵabwezeranso kudothi komweko.

²Adaŵalembera masiku oŵerengeka ndi nthaŵi yochepa, koma adaŵapatsa ulamuliro pa zolengedwa zonse.

³Adaŵapatsa mphamvu zonga zake, ndipo adaŵalenga mofanafana naye.

⁴Zolengedwa zamoyo zonse adazipatsa mantha oopa anthu. Adapatsadi anthu ulamuliro pa nyama ndi mbalame.

⁵Anthuwo adalandira mphamvu zisanu kwa Mulungu, ina yachisanu ndi chimodzi inali ya nzeru za kuganiza bwino, inanso yachisanu ndi chiŵiri inali ya nzeru zolongosolera ntchito za mphamvu zakezo.

⁶Anthuwo adaŵapatsa pakamwa, maso ndi makutu, adaŵapatsanso mtima woganizira.

⁷Adaŵadzaza ndi nzeru zodziŵa zinthu ndi zomvetsa zinthu, ndipo adaŵasonyeza kuti zabwino ndi izi, zoipa ndi izi.

⁸Mulungu adaikamo kuŵala kwake m'mitima mwao, kuti aŵaonetse ukulu wa ntchito zake.

⁹Adaŵalola kuti azinyadira ntchito zake zodabwitsa mpaka muyaya.

¹⁰Choncho iwo adzatamanda dzina lake loyera, adzalalika ukulu wa ntchito zake.

¹¹Iye adaŵaninkha nzeru, naŵapatsa Malamulo opatsa moyo.

¹²Adapangana nawo chipangano chamuyaya, naŵaululira Malamulo ake.

¹³Motero anthu adaona ulemerero wa Mulungu ndi maso ao, ndipo adamva ulemerero wa mau ake m'makutu mwao.

¹⁴Iye adaŵauza kuti, “Lewani choipa chilichonse,” ndipo adaphunzitsa munthu aliyense m'mene azikhalira ndi anzake. Za kuweruza kwa Mulungu

¹⁵Machitidwe a anthu amadziŵika pamaso pa Mulungu nthaŵi zonse, sangathe kubisika konse pamaso pake.

¹⁶Kuyambira ali ana, machitidwe ao adapendekera ku zoipa, akulephera kusandutsa mitima yao youma ngati miyala kuti ikhale yofeŵa ngati mnofu.

¹⁷Mtundu uliwonse adaupatsa mtsogoleri wake, koma adasankha Aisraele kuti akhale choloŵa chake.

¹⁸Amaŵaphunzitsa mwambo poti ndi ana ake achisamba, amaŵaunikira ndi chikondi chake ndipo saŵasiya.

¹⁹Ntchito zao zonse zili ngati dzuŵa pamaso pake, amaziyang'anitsa nthaŵi zonse.

²⁰Zoipa zao sizibisika pamaso pa Ambuye, Iwo amaona machimo ao onse.

²¹Ambuye ngokoma mtima, amadziŵa zolengedwa zao, saziwononga kapena kuzisiya, koma amazisunga.

²²Munthu akathandiza osauka, kwa Ambuye chithandizocho chili ngati mphete yamtengowapatali, ndipo chifundo chimenecho kwa Ambuye chili ngati mwana wa diso lao.

²³Potsiriza pake adzadzambatuka nadzalipira onse, ndipo adzaŵabwezera zonse pamutu pao monga kuyenera.

²⁴Komabe munthu wolapa Ambuye amampatsa mpata kuti abwerere kwa Iwo, ndipo munthu wa khama lofookerapo Ambuye amamlimbitsa mtima. Aŵauza kuti atembenuke mtima

²⁵Tsono bwerera kwa Ambuye, ndipo leka zoipa zako. Upemphere kwa Ambuye, ndipo uchepetse machimo ako.

²⁶Bwerera kwa Mulungu Wopambanazonse, ndipo lekeratu kuchimwa. Udane nazo kwambiri zonyansa zonse.

²⁷Tingatamande bwanji Mulungu Wopambanazonse pamene tili m'manda, ngati sitimtsira ulemu pamene tili moyo?

²⁸Anthu akufa sangathe kutamanda, ali ngati anthu amene kunalibe chikhalire. Okhaokhawo amene ali ndi moyo angathe kutamanda Mulungu.

²⁹Ndithu chifundo cha Ambuye nchachikulu, ndipo amakhululukira onse obwerera kwa Iwo.

³⁰Munthu sangathe kukhala ndi zonse, poti ana a anthu sadzakhalapo mpaka muyaya.

³¹Kodi chilipo china choŵala kupambana dzuŵa? Komabe mwina kuŵala kwa dzuŵa kumaleka. Momwemonso munthu wamnofu ndi wamagazi sakhalira kuganiza zoipa.

³²Mulungu amayang'anira nyenyezi zamumlengalenga, koma anthu onse ndi fumbi ndi phulusa chabe.