Read Buku Loyera - Chichewa Mphu. 18 Bible Online

Mphu. 18 - Buku Loyera - Chichewa bible

Mphu. 18

¹Za ukulu wa Mulungu Amene ali ndi moyo wamuyaya, ndiye amene adalenga zonse.

²Ambuye okha ndiwo olungama, palibenso wina koma Iwo okha.

³Amayendetsa dziko lapansi ndi chala chokha, ndipo zinthu zonse zimamvera malamulo ao. Paja Iwo ndi Mfumu ya zinthu zonse, amaonetsa mphamvu zao polekanitsa zinthu zoyera ndi zinthu wamba.

⁴Palibe munthu amene Ambuye adamtuma kuti akalalike ntchito zao. Ndani angathe kufufuza bwino ntchito zao zodabwitsa?

⁵Palibe ndi mmodzi yemwe amene angathe kudziŵa kukula kwa mphamvu zao. Palibenso amene angathe kufotokoza mbiri yonse ya ntchito zao zachifundo.

⁶Munthu sangathe kuwonjezera pa ntchitozo kapena kuchotsapo, nkosatheka kuzitsata bwino zodabwitsa zonse za Ambuye.

⁷Pamene munthu wamaliza nkhani imeneyi, ndiye kuti wangoyamba kumene, ndipo akalekeza, amangotibe kakasi. Zakuti munthu si kanthu konse

⁸Kodi munthu nchiyani, ndipo ali ndi ntchito yanji? Kodi ntchito zake zabwino ndi zoipa zimaonetsa chiyani?

⁹Masiku a moyo wake mwina angakwanire zaka 100, akatero ndiye kuti wafika patali.

¹⁰Tikazilinganiza ndi nthaŵi yamuyaya, zaka za moyo wake zili ngati kadontho kamodzi m'nyanja kapenanso ngati kamchenga kamodzi.

¹¹Nchifukwa chake Ambuye amaŵalezera mtima anthu, ndipo amaŵachitira chifundo.

¹²Amaona ndi kudziŵa tsoka limene litha kuŵagwera. Nchifukwa chake amaŵakhululukira kaŵirikaŵiri.

¹³Munthu amachitira chifundo anzake okha, koma Ambuye amachitira chifundo zolengedwa zonse. Amazidzudzula, amaziphunzitsa ndi kuzilangiza, amazibweza monga m'mene mbusa amazichitira nkhosa zake.

¹⁴Amachitira chifundo onse otsata malangizo ao, ndi amene amamvera mwachangu malamulo ao. Za luso la kupatsa

¹⁵Mwana wanga, uzichitira anzako zabwino mosatonzera, ndipo ukapereka kanthu, usanenepo mau oŵaŵa.

¹⁶Kodi suja mame amaziziritsa kutentha? Chimodzimodzinso mau angathe kupambana mphatso.

¹⁷Zoonadi mau abwino amapambana mphatso yaikulu, munthu wokoma mtima ali ndi ziŵiri zonsezo.

¹⁸Chitsiru chimangonyoza ndi kunyodola anzake, mphatso ya munthu womana imaŵaŵitsa maso. Za kuganizira bwino ndi kuwoneratu zam'tsogolo

¹⁹Usanalankhule uyambe waganizira bwino, ndipo udzisamale usanayambe kudwala.

²⁰Asanakuweruze, uyambe wadzifunsitsa bwino, ndipo udzapeza chikhululukiro akakuzenga mlandu.

²¹Udzichepetse usanayambe kudwala, ndipo ukachimwa ulape msangamsanga.

²²Chilichonse chisakuletse kuchita zimene udalumbira, ndipo usadikire mpaka imfa kuti ukonze zinthu.

²³Usanalumbire, uyambe waganiza bwino, usakhale ngati munthu woyesa Ambuye.

²⁴Uganiziretu za ukali umene udzakumane nawo pa nthaŵi ya kufa, ndiponso za chilango chimene udzachiwone ngati Ambuye adzakufulatira.

²⁵Pa nthaŵi uli ndi zakudya zambiri, uzikumbukira nthaŵi ya njala, ndipo pa nthaŵi uli ndi umphaŵi ndi ya usiŵa, uzikumbukira nthaŵi ya chuma.

²⁶Kuchokera m'maŵa kufikira madzulo, pakatipa zinthu nkusintha. Zoonadi zinthu zimasinthika msanga pamaso pa Ambuye.

²⁷Munthu wanzeru amakhala tcheru nthaŵi zonse, ndipo pa masiku oipa amasamala kuti asachimwe.

²⁸Munthu aliyense wanzeru amaphunzira luntha, ndipo amalemekeza amene adalipeza.

²⁹Anthu omvetsa zisudzo amasanduka aluntha iwo omwe, ndipo amakamba miyambi yoyenera. Za kudziletsa

³⁰Usamvere mapendekero ako oipa, ndipo uletse zilakolako zako zosayenera.

³¹Ukatsata zilakolako zako, adani ako adzakuseka.

³²Usakonde zosangalatsa zamtengowapatali, kuti ungaonongeretu ndalama zako.

³³Usasanduke mmphaŵi pobwereka ndalama zochitira maphwando pamene m'thumba mwako mulibe kanthu.