Read Buku Loyera - Chichewa Mphu. 19 Bible Online

Mphu. 19 - Buku Loyera - Chichewa bible

Mphu. 19

¹Chidakwa sichilemera, ngakhale chikhale pa ntchito. Munthu wonyoza zinthu zazing'ono, amanka naagwa pang'onopang'ono.

²Zoledzeretsa ndiponso akazi zimaononga anthu anzeru. Munthu wokonda akazi adama amatha manyazi moipa.

³Potsiriza pake adzakhala chakudya cha mphutsi ndi nyongolotsi, kupanda manyazi kwakeko kudzamuphetsa. Kulankhula zachabe nkoipa

⁴Kukhulupirira munthu msanga kumaonetsa mtima wosaganiza bwino, ndipo kuchimwa kumapweteka wochimwa yemweyo.

⁵Munthu wokondwerera machimo adzalangidwa.

⁶Koma wodana ndi ukazitape zoipa zimamuchepera.

⁷Usamabwerezabwereza zimene udamva, ndipo sudzapeza mavuto.

⁸Kaya ndi bwenzi wako kaya ndi mdani wako, usamkambire, usaulule pokhapokha ngati nkuchimwa kukhala chete.

⁹Mwina ena nkumva mau akowo nayamba kusakukhulupirira, pambuyo pake nkudzadana nawe.

¹⁰Ngati wamva mphekesera, zithere mwa iwe. Usachite mantha, sungaphulike nazo.

¹¹Chitsiru chikamva kanthu, chimamva kupweteka mu mtima ngati kupweteka kwa mkazi pobala mwana.

¹²Mumtima mwa chitsiru mukaloŵa nkhani, ndiye ngati mpaliro wazika m'ntchafu. Usakhulupirire zonse zakumva

¹³Umfunse bwenzi wako, mwina mwake sadachite kanthu, ndipo ngati adachita kanthu, ndiye kuti sadzachitanso.

¹⁴Umfunse mnzako, mwina mwake sadanene kanthu. Ngati adanenadi, sadzanenanso.

¹⁵Umfunse bwenzi lako, poti osinjirira ngambiri. Usakhulupirire zonse zokuuza anthu.

¹⁶Mwina munthu amalankhula padera mosafuna. Kodi ndani asanachimwe konse polankhula.

¹⁷Usanaopseze mnzako, uyambe wamufunsa bwino, uleke Malamulo a Mulungu Wopambanazonse agwire ntchito.

¹⁸Kuwopa Ambuye ndiye chiyambi choti atikomere mtima, ngati uli ndi luntha Ambuye amakukonda.

¹⁹Kudziŵa Malamulo a Ambuye ndiye mwambo wopatsa moyo. Amene amachita zokomera Ambuye, amadya za mtengo wa moyo wosatha. Za nzeru zoona ndi zonyenga

²⁰Nzeru nkuwopa Ambuye, nzeru nkutsata Malamulo ndi kudziŵa kuti Mulungu ndiye Wamphamvuzonse.

²¹Wantchito wouza mbuye wake kuti, “Sindichita zimene mukufuna,” ngakhale pambuyo pake achitebe, zimamupsetsa mtima munthu womsunga uja.

²²Komatu kukhala wodziŵa pa zoipa si nzeru, malangizo a anthu ochimwa sangakuphunzitse zanzeru.

²³Pali kuchenjera kwina kumene anthu amadana nako ndipo pali zitsiru zina zongokhala zopanda nzeru.

²⁴Ndi bwino kukhala woopa Mulungu uli wopanda nzeru kupambana kukhala ndi nzeru zambiri uli wophwanya Malamulo.

²⁵Pali kuchenjera kwina kwenikweni ndithu koma kosalungama, palinso anthu opotoza zoona kuti zinthu ziŵayendere bwino.

²⁶Pali tambwali woyenda ŵeraŵera kuwonetsa chisoni, pamene mumtima mwake ali wonyenga.

²⁷Amaphimba nkhope namadziwonetsa ngati wosamva, koma ngati palibe wina woyang'ana, amakuchenjerera.

²⁸Pali ena amene sachimwa chifukwa chosoŵa mphamvu, koma akangopeza danga, amachita ndithu zoipa.

²⁹Munthu ungathe kumdziŵira maonekedwe, ndipo munthu wanzeru amazindikirika ndi pamaso pomwe.

³⁰Zovala za munthu ndi kasekedwe kake ndiponso kayendedwe, zonsezi zimaonetsa mkhalidwe wake.