Read Buku Loyera - Chichewa Mphu. 2 Bible Online

Mphu. 2 - Buku Loyera - Chichewa bible

Mphu. 2

¹Za Kukhala wokhulupirika kwa Mulungu Mwana wanga, ukafuna kutumikira Ambuye, ukonzekere kuyesedwa ndi masautso.

²Ukhale wa mtima woona, ndiponso munthu wosatepatepa. Usataye mtima msanga pa nthaŵi ya zovuta.

³Ukangamire Mulungu osamsiya, kuti udzapeze ulemerero pa kutha kwa moyo wako.

⁴Upirire zilizonse zokugwera, ndipo ukamva manyazi nthaŵi zina, ukhalebe wopirira.

⁵Pajatu golide amamuyesa m'ng'anjo ya moto, ndipo Ambuye amayesa anthu m'ng'anjo ya zotsitsa.

⁶Ukhulupirire Ambuye, ndipo adzakuthandiza. Utsate njira yolungama ndipo uŵakhulupirire.

⁷Inu amene mumaopa Ambuye, muyembekeze chifundo chao. Musaŵafulatire kuti mungagwe.

⁸Inu amene mumaopa Ambuye, muŵakhulupirire, ndipo simudzalephera kulandira mphotho.

⁹Inu amene mumaopa Ambuye, mukhulupirire zinthu zabwino pa moyo wanu, mukhulupirire chikondwerero chamuyaya ndiponso chifundo.

¹⁰Muganizire za mibadwo yakale ndipo muwone kuti kodi alipo amene adaakhulupirira Ambuye, Iwo namuchititsa manyazi? Kodi alipo amene adaalimbikira kuwopa Ambuye, Iwo namusiya? Kodi alipo amene adaapempha Ambuye kanthu, Iwo osamumvera?

¹¹Pajatu Ambuye ngokoma mtima ndiponso achifundo. Amakhululukira machimo, amapulumutsa anthu pa nthaŵi ya mavuto.

¹²Tsoka kwa anthu a mtima wolefuka ndi a manja olobodoka. Tsoka kwa wochimwa amene ali ndi mtima wapaŵiripaŵiri.

¹³Tsoka kwa amene ali ndi mtima wosalimbikira ndi wosakhulupirira, chifukwa cha chimenecho sadzathandizidwa.

¹⁴Tsoka kwa inu amene mudalekeza kulimbikira kwanu. Nanga mudzatani tsiku lodzakulangani Ambuye?

¹⁵Anthu oopa Ambuye amamvera mau ao. Onse okonda Ambuye amatsata njira zao.

¹⁶Anthu oopa Ambuye amayesetsa kuchita chifuniro cha Ambuyewo. Anthu okonda Ambuye amatsata Malamulo ao.

¹⁷Anthu oopa Ambuye amakonzeratu mitima yao, amadzichepetsa pamaso pa Ambuye.

¹⁸Amati, “Tiyeni tigwe m'manja mwa Ambuye, osati m'manja mwa anthu, popeza kuti chifundo chao nchachikulu ngati ufumu wao.”