Read Buku Loyera - Chichewa Mphu. 20 Bible Online

Mphu. 20 - Buku Loyera - Chichewa bible

Mphu. 20

¹Za kulankhula ndi kukhala chete Kulipo kudzudzula kwina kochitika pa nthaŵi yosayenera, ndipo alipo anthu ena achete, koma ali anzeru.

²Kudzudzula nkwabwino kupambana kusunga mkwiyo mu mtima. Munthu, wovomera cholakwa, amapulumuka ku chilango.

³Nkwabwino kwambiri kulapa akakudzudzula, motero udzapewa kuchimwa mwadala.

⁴Munthu wofuna kukhazikitsa chilungamo mwankhanza, ali ngati mfule woyesa kuchita dama ndi namwali.

⁵Mwina munthu amakhala chete, anthu nkumati ndi wanzeru, pamene wina amadana naye chifukwa cha kulongolola kwake.

⁶Mwina munthu amakhala chete chifukwa chosoŵa choyankha. Pamene wina amakhala chete chifukwa chodziŵa nthaŵi yake yolankhula.

⁷Munthu wanzeru amakhala chete kudikira nthaŵi yoyenera, pamene wonyada ndi wopusa sadziŵa kuti nthaŵi yabwino ndi iti.

⁸Munthu wolongolola anzake samukonda, munthu woyerekedwa anzake amadana naye. Mau ozunguza

⁹Mwina munthu amapeza phindu m'mavuto, koma mwinanso mwai umasanduka tsoka.

¹⁰Mwina mphatso sikupindulira kanthu, koma mwinanso imakupindulira moŵirikiza.

¹¹Kukonda ulemu kwambiri mwina kumadzetsa manyazi, komanso mwina anthu otsika amasanduka apamwamba.

¹²Mwina munthu amagula zinthu zambiri pa mtengo wotsika, koma nkulipira mobzolera ngati kasanunkaŵiri.

¹³Munthu wanzeru, anthu amamkonda akamalankhula, koma kushashalika kwa zitsiru kumangopita padera.

¹⁴Mphatso yochokera kwa munthu wopusa sidzakupindulitsa, chifukwa iye akuyembekeza kulandira ina yokulapo ngati kasanunkaŵiri.

¹⁵Amathandiza pang'ono, koma amadzudzula kwambiri, amakuza mau ngati mlaliki. Lero akongoza mnzake kanthu, maŵa lino wayamba kulonjelera. Munthu wotere anzake amadana naye zedi.

¹⁶Chitsiru chimati, “Ine ndilibe bwenzi. Palibe amene amathokoza ntchito zanga zabwino. Anthu odya nane ndiwonso amandinyoza.”

¹⁷Ndithudi munthu wotere ambiri adzamseka, ndipo adzamseka kaŵirikaŵiri. Za kulankhula mosayenera

¹⁸Ndi bwino kuterereka pa mwala kupambana kuterereka pa mau. Kugwa kwa munthu wochimwa kumadza choncho modzidzimutsa.

¹⁹Munthu wopanda mwambo ali ngati nkhani yosayenera kuikamba, imene anthu opanda nzeru amaikamba kosalekeza.

²⁰Mwambi wochoka m'kamwa mwa chitsiru anthu amaukana, popeza kuti chitsirucho chimaunena nthaŵi yosayenera.

²¹Anthu ena amalephera kuchimwa chifukwa cha umphaŵi, choncho akamapumula, mtima umakhala uli zii.

²²Mwina munthu atha kutaya moyo wake chifukwa cha manyazi, mwina atha kuutaya chifukwa cha maganizo a munthu wopusa.

²³Chifukwa cha manyazi wina atha kulonjeza bwenzi lake zinthu, potero amamsandutsa mdani wake popanda chifukwa. Za Bodza

²⁴Bodza limaononga mbiri ya munthu, koma anthu opanda nzeru bodza silichoka pakamwa pao.

²⁵Mbala ili bwinoko kuposa kamabodza, komabe aŵiri onsewo chao nchiwonongeko.

²⁶Khalidwe la kunama nloipitsitsa, munthu wabodza manyazi samuchoka. Za munthu wanzeru

²⁷Munthu wolankhula zanzeru amakwera yekha, munthu wa maganizo akucha amakondweretsa akulu.

²⁸Munthu wolima bwino amakolola zambiri, ndipo munthu wokondweretsa akulu amamkhululukira zolakwa zake.

²⁹Mphatso ndi zopereka zimadetsa m'maso anthu anzeru, zimaŵatseka pakamwa, choncho sangathenso kudzudzula.

³⁰Kodi nzeru zobisika ndi chuma chosaoneka zili ndi phindu lanji?

³¹Munthu wobisa uchitsiru ali bwinoko kuposa wobisa nzeru.