Read Buku Loyera - Chichewa Mphu. 21 Bible Online

Mphu. 21 - Buku Loyera - Chichewa bible

Mphu. 21

¹Machimo osiyanasiyana Kodi wachimwa mwana wanga? Usachimwenso tsono, ndipo upemphe chikhululukiro cha zolakwa zako zakale.

²Uzithaŵa tchimo monga m'mene umathaŵira njoka, chifukwatu tchimo ukaliyandikira limakuluma. Mano ake ali ngati a mkango, limalanda moyo wa anthu.

³Kusatsata Malamulo kuli ngati lupanga lakuthwa konsekonse, limadzetsa chilonda chosapola.

⁴Kuwopseza ena ndi kuchita nkhanza kumaononga chuma cha munthu, choncho nyumba ya munthu wonyada idzapasuka.

⁵Kupemphera kwa munthu wosauka kumaŵaloŵa m'makutu Ambuye, ndipo amamthandiza msanga.

⁶Wodana ndi kudzudzulidwa akutsata njira ya anthu ochimwa, koma aliyense woopa Ambuye amalapa ndi mtima wonse.

⁷Munthu wolongolola amadziŵika ponseponse, koma munthu wanzeru amazindikira kulakwa kwake.

⁸Munthu womanga nyumba ndi ndalama zobwereka, ali ngati munthu wodziwunjikira miyala ya pamanda pake.

⁹Msonkhano wa anthu osasamala Malamulo, uli ngati mulu wa mapesi, mathero ake ndi moto ndithu basi.

¹⁰Mseu wa anthu ochimwa ngwosalala, koma kumathero kwake nkumanda. Za munthu wanzeru ndi munthu wopusa

¹¹Aliyense wosunga malamulo, amatha kulamulira maganizo ake. Kuwopa Ambuye ndiye chiyambi cha nzeru.

¹²Munthu wopanda luso sangaphunzitsidwe. Komabe lilipo luso lina lodzetsa zoŵaŵa.

¹³Nzeru za munthu waluntha zili ngati mtsinje wosefukira, malangizo ake ali ngati kasupe wamoyo.

¹⁴Mtima wa chitsiru uli ngati mtsuko wobooka, susunga zimene waphunzira.

¹⁵Munthu wophunzira akamva mau anzeru amaŵabvomereza, ndipo amaonjezapo mau ena anzeru. Koma chitsiru chikamva mau omwewo sichiŵakonda, chimaŵaponya kumbuyo.

¹⁶Mau a chitsiru ngovuta ngati katundu wolemera pa ulendo, koma kumva nkhani zanzeru kumakondweretsa.

¹⁷Pa msonkhano anthu amakonda kumva mau a munthu wanzeru, ndipo amaŵasinkhasinkha mumtima mwao.

¹⁸Nzeru za munthu wopusa zili ngati nyumba yopasuka, iye amangodziŵa kunena zosokonezeka.

¹⁹Kwa munthu wopusa kuphunzira kuli ngati matangadza m'miyendo, ngati unyolo ku dzanja lake lamanja.

²⁰Munthu wopusa amaseka mokweza, koma munthu wochenjera amangoti mwee.

²¹Kwa munthu wanzeru kuphunzira kuli ngati makaka agolide, ngati khoza pa mkono wa ku dzanja lamanja.

²²Munthu wopusa amangoti m'nyumba gulupiti, koma munthu wanzeru amaima panja mwaulemu.

²³Munthu wopusa amasuzumira pa khomo, koma munthu wa mwambo amaima pa khomo.

²⁴Kumamvetsera m'makomo mwa anthu nkupanda mwambo. Munthu wanzeru amadziŵa kuti zimenezi nzochititsa manyazi.

²⁵Akazitape amangobwereza zimene anthu ena alankhula, koma anthu anzeru amayamba asanthula mau ao.

²⁶Anthu opusa amayamba nkulankhula asanaganize, koma anthu anzeru amayamba aganiza asanalankhule.

²⁷Munthu akatemberera mdani wake ndiye kuti akudzitemberera iye yemwe.

²⁸Kazitape amangodziipitsa yekha, anthu onse oyandikana naye amadana naye.